Հայաստանը ճանաչվել է մասամբ ազատ երկիր: Ըստ Freedom House միջազգային իրավապաշտպան կազմակերպության ՀՀ-ն 100 հնարավոր միավորից ստացել է 45 միավոր:
Դեմոկրատիան նահանջում է ամբողջ աշխարհում, ինչին նպաստում է Ամերիկայում դեմոկրատական չափանիշների արագ քայքայումը: Այս տխուր եզրահանգումն արձանագրված է Freedom House իրավապաշտպան կազմակերպության այսօր հրապարակած «Ազատությունն աշխարհում-2018» զեկույցում:
Տարեկան զեկույցի հեղինակները վերլուծում են քաղաքական իրավունքների և քաղաքացիական ազատությունների վիճակն աշխարհում: Հայաստանը զեկույցում պահպանել է իր տեղը «մասամբ ազատ» երկրների ցանկում, որում նախկին խորհրդային երկրներից են նաև Վրաստանը, Ղրղըզստանը, Մոլդովան և Ուկրաինան, գրում է Ազատությունը:
«Ոչ-ազատ» են համարվում Ադրբեջանը, Բելառուսը, Ղազախստանը, Ռուսաստանը, Տաջիկստանը, Թուրքմենստանը և Ուզբեկստանը: Ուշագրավ է, որ «վիճելի» տարածքներ բաժնում Աբխազիան և Լեռնային Ղարաբաղը «մասամբ ազատ» են, իսկ Ղրիմը, Հարավային Օսիան և Մերձդնեստրը՝ «ոչ-ազատ»:
Հարևաններից Թուրքիան տեղափոխվել է «ոչ-ազատ» -ների խումբ, որտեղ նաև Իրանն է:
Երկու հսկաներ՝ Չինաստանն ու Ռուսաստանը դեմոկրատիայի նահանջն օգտագործել են ներսում հալածանքները սաստկացնելու և արտասահմանում իրենց «չար» ազդեցությունը խթանելու համար: Մոլորակի բնակչությունը 7 միլիարդ 400 միլիոն է: Մարդկանց 39 տոկոսն ապրում է «ազատ» երկրներում, 24 տոկոսը՝ «մասամբ ազատ» և 37 տոկոսը՝ «ոչ ազատ»:
Զեկույցում նշված 195 պետությունների 45 տոկոսն «ազատ» է, 30 տոկոսը «մասամբ ազատ» և 25 տոկոսը «ոչ ազատ» է:
Զեկույցի հեղինակները նշում են, որ Միացյալ Նահանգներում անցած 7 տարում նահանջ է նկատվել:
Սակայն, 2017-ին անկումն արագացել է, ինչի պատճառներն են դիտվում 2016 թվականին ռուսների միջամտությունը ԱՄՆ նախագահական ընտրություններին, նոր վարչակազմի, այդ թվում՝ հենց ԱՄՆ նախագահ Դոնալդ Թրամփի կողմից էթիկայի հիմնարար չափանիշների ոտնահարումը, կառավարության աշխատանքի թափանցիկության նվազումը:
Մասնավորապես, Freedom House-ը մտահոգություն է հայտնում մամուլի վրա Թրամփի հաճախակի դարձած հարձակումների կապակցությամբ, քանի որ դրանք ի վերջո կարող են սահմանափակել ազատ և անկախ լրատվամիջոցներից տեղեկություններ ստանալու հասարակության իրավունքը:
Այդպիսով, Միացյալ Նահանգները 100-բալանոց սանդղակով ունի 86 միավոր, զիջում է Ֆրանսիային, Գերմանիային և Մեծ Բրիտանիային, սակայն միևնույն է բարձր տեղ է գրավում «ազատ» երկրների շարքում:
Աշխարհի «ոչ-ազատ» երկրների ցուցակում վերջին հինգ տեղերում են Թուրքմենստանը, Հյուսիսային Կորեան, Էրիթրեան, Հարավային Սուդանը և Սիրիան:
