Հայաստանում ի տարբերություն Եվրոպայի գնաճն ավելի շատ է զգացվում, քանի որ բնակչությունն իր բյուջեի կեսը սպառողական ապրանքների վրա է ծախսվում: Եվրոպայում այդ ցուցանիշը մոտ 25-30 տոկոսն է: Այս մասին լրագրողների հետ հանդիպմանն ասաց սոցիոլոգ Ահարոն Ադիբեկյանը՝ հավելելով, որ գնաճ տեղի է ունեցել ամբողջ աշխարհում:
Նրա խոսքով, գնաճը Հայաստանում միանգամից ազդում է մարդկանց սպառման մակարդակի և որակի վրա, քանի որ գնի բարձրացումը չի ինդեքսավորվում աշխատավարձերի և նպաստների վրա:
«Բոլոր դեպքերում կա տնտեսական աճ, բայց աշխատավարձները և թոշակները մնում են նույն մակարդակում: Մեր ընտանիքների բյուջեի 47 տոկոսն աշխատավարձից է ձևավորվում, 26 տոկոսը՝ թոշակներից և նպաստներից: Այս պատճառով գների բարձրացումը բացասաբար է ազդում մոտ 75 տոկոսի վրա»,- պարզաբանեց փորձագետը:
Նա նաեւ չի հավատում, որ Հայաստանում գործազրկությունը կրճատվել է զբաղվածության ու բնակչության տնտեսական ակտիվության բարձրացման շնորհիվ, ինչի մասին վերջերս տվյալներ հրապարակեց Ազգային վիճակագրական ծառայությունը:
Ինչպես փաստում են ՀՀ ազգային վիճակագրական ծառայության տվյալները, բնակչության տնտեսական ակտիվության մակարդակը 2017-ի առաջին եռամսյակում եղել է 58. 9 տոկոս, երկրորդում՝ 60.5, երրորդում՝ 63.4 տոկոս: Ընդ որում, տնտեսապես ավելի ակտիվ են եղել տղամարդիկ: Ավելացել է նաև զբաղվածության մակարդակը: Առաջին եռամսյակում բնակչության զբաղվածությունը եղել է 47.7 տոկոս, երկրորդում՝ 49. 7 տոկոս, երրորդում բարձրացել է՝ դառնալով 52.9 տոկոս:
Իսկ գործազրկության մակարդակ, ըստ նույն պաշտոնական տվյալների, ունեցել է նվազման միտում: 2017-ի առաջին եռամսյակում կազմել է 19.0 տոկոս, երկրորդում՝ 17.8 , իսկ երրորդում՝ 16.5 տոկոս:
«Գործազրկության մակարդակը կրճատվել է ոչ թե աշխատատեղերի ստեղծման, այլ արտագաղթի շնորհիվ»,- չհամաձայնեց պաշտոնական վիճակագրության հետ սոցիոլոգը՝ հավելելով, որ գործազուրկների մակարդակը ուզում են կրճատել, բայց կառավարությունում, տարբեր նախարարություններում կրճատումներ են գնում:
Ադիբեկյանի խոսքով, մեծ հարցականի տակ է մնում այն հույսը, որ Կարեն Կարապետյանի կառավարությունը կարող է ստեղծել բարենպաստ ներդրումային մթնոլորտ Հայաստանում, որի արդյունքում արտաքին ներդրումներ կկատարվեն կգան ու աշխատատեղեր կստեղծվեն:
Թանկացումներից հետո կառավարությունը որևէ ձևով չի նայում այս հարցի կոմպենսացմանը։ Նույնը վերաբերում է նաև կոմունալ ծախսերի ավելացմանը. կառավարությունը որևէ ձևով չի նայում, թե քաղաքացին ինչպես, որտեղից պետք է գումարներ հայթայթի։ Իր հերթին ասուլիսի ժամանակ ասաց ՀՀՇ վարչության անդամ Հովհաննես Իգիթյանը։
«Հայաստանում ներքին շուկայի սպառողները մեծ գումարներ վճարում են արհեստական կամ կոռուպցիոն ծախսերի համար։ Եթե համեմատենք այլ երկրների հետ, Հայաստանում այդ գումարն ավելի բարձր է»,- նշեց նա։
«Սա սոցիալական բեռ է առաջին հերթին, բայց եթե մակրոտնտեսության տեսակետից նայենք, ապա ստացվում է, որ քաղաքացիները կարող էին արդյունաբերության կամ գյուղատնտեսության ապրանք գնելով զարգացնել այդ ոլորտները, սակայն այդ գումարը սահմանափակվում է և գնում է այլ ոլորտ։ Ընդ որում՝ կոռումպացված ոլորտ. մենք գիտենք, որ գազի գինը Հայաստանում ունի շատ մեծ կոռուպցիոն մասնաբաժին»,- նկատեց նա։
