«Կաջակցե՞ք ինձ». Պուտինը պատասխանել է իր առաջադրման մասին հարցին

Ռուսաստանի նախագահ Վլադիմիր Պուտինը պատասխանել է 2018 թ-ի նախագահական ընտրություններին իր թեկնածությունն առաջադրելու մասին հարցին:

Պուտինն այս հարցին անդրադարձել է «Ռուսաստանի կամավոր» մրցանակաբաշխության ժամանակ: «Դա միշտ յուրաքանչյուր մարդու համար շատ պատասխանատու որոշում է», - ասել է Պուտինը եւ դիմել կամավորներին հարցով՝ կաջակցեն արդյոք նրանք իր հնարավոր առաջադրումը:

«МегаСпорт» պալատի դահլիճում հավաքվածները բացականչել են «այո»:

Ի պատասխանը Պուտինը շնորհակալություն է հայտնել նրանց եւ խոստացել մոտ ժամաակներս իր մասնակցության վերաբերյալ որոշում ընդունելիս հաշվի առնել նաեւ նրանց կարծիքը:

Ավելի վաղ ռուսական ԶԼՄ-ները հայտնել էին, որ հավանաբար Ռուսաստանի նախագահ Վլադիմիր Պուտինն ընտրություններին կառաջադրվի «Եդինայա Ռոսիա» կուսակցությունից:

Ռուսաստանի նախագահական ընտրությունները կայանալու են 2018 թվականի մարտի 18-ին:

Մինչ այդ ՌԴ նախագահական ընտրություններին մասնակցելու մտադրություն էին հայտնել լրագրող Եկատերինա Գորդոնը, հայտնի հեռուստահաղորդավար Քսենիա Սոբչակը, պոռնոաստղ Ելենա Բերկովան, Ռուսաստանի կոմունիստական կուսակցության (ՌԿԿ) նախագահ Գենադի Զյուգանովը եւ Ռուսաստանի լիբերալ դեմոկրատական կուսակցության առաջնորդ Վլադիմիր Ժիրինովսկիին: