«Ծառուկյան» դաշինքում խաղաղվեցին. 3 ըմբոստ պատգամավոր ինքնաբացարկ է հայտնել

«Ծառուկյան դաշինք» խմբակցության երեք պատգամավորներ՝ Խաչիկ Մանուկյանը, Հարություն Կարագյոզյանը և Արտյոմ Ծառուկյանը ինքնաբացարկի դիմումներ են ներկայացրել: Այս մասին ԱԺ նիստի ժամանակ հայտարարեց ԱԺ նախագահ Արա Բաբլոյանը:

Նա պարզաբանեց, որ ըստ ԱԺ կանոնակարգ օրենքի՝  եթե դիմումների հրապարակումից մեկ շաբաթ անց պատգամավորները գրավոր դիմումով հետ չվերցնեն իրենց դիմումը, ապա կազմվում է արձանագրություն և դրանք հայտարարվում են ընդունված:

Հիշեցնենք, Խաչիկ Մանուկյանը, Հարություն Կարագյոզյանը և Արտյոմ Ծառուկյանը այն 11 պատգամավորներից են, որոնք ԿԸՀ-ից հետ վերցրեցին ինքնաբացարկի իրենց դիմումները և վիրավորված էին Գագիկ Ծառուկյանից: Նրանք ներկայացել էին ԿԸՀ և պնդել, որ նախկինում իրենց ներկայացված դիմումը համարվի չեղյալ, քանզի իրենք չեն հրաժարվում մանդատը ստանալուց: