Սամվել Կարապետյանի աջակցությունը բանակին եղել է էական և ծավալուն. Դավիթ Տոնոյան

ՀՀ պաշտպանության նախկին նախարար Դավիթ Տոնոյանը հերքել է իշխող քաղաքական թիմի ներկայացուցիչների պնդումները, թե հայտնի գործարար Սամվել Կարապետյանը 44-օրյա պատերազմի ընթացքում սահմանափակվել է միայն խաղաղության կոչերով՝ ընդգծելով նրա բազմակողմանի և զգալի ներդրումը զինված ուժերին։

Տոնոյանը պարզաբանել է, որ ռազմական գործողությունների ժամանակ բանակին ցուցաբերված օգնության կոնկրետ մանրամասները հանդիսանում են պետական և ծառայողական գաղտնիք, ինչի պատճառով հնարավոր չէ հանրայնացնել հստակ տվյալներ։ Այդուհանդերձ, նախկին նախարարը վստահեցրել է, որ «Տաշիր» ընկերությունների խմբի նախագահի աջակցությունը եղել է ծավալուն և համապարփակ։

Նա հավելել է, որ այս գործընթացը սկսվել է դեռևս մինչև 2018 թվականի իշխանափոխությունը և շարունակվել մինչև մարտական գործողությունների ավարտը, իսկ տրամադրված օգնության ողջ ծավալը պաշտոնապես արձանագրված է պաշտպանական գերատեսչության համապատասխան փաստաթղթերում։

Անդրադառնալով այն հարցին, թե արդյոք Կարապետյանն ամբողջությամբ հոգացել է պատերազմի օրերին բանակի սննդի ապահովման ծախսերը, Տոնոյանը նշել է, որ նման ձևակերպումը կլիներ կիսաճշմարտություն։

Նա բացատրել է, որ պատերազմական շրջանում զինված ուժերի օրական ծախսերը տատանվել են 3-ից մինչև 30 միլիոն դոլարի սահմաններում, և նվիրատուների տրամադրած ֆինանսական միջոցներն ու ռեսուրսները ուղղվել են տարբեր հրատապ գնումների և կազմակերպչական խնդիրների լուծմանը։ Պաշտպանության նախկին նախարարը շեշտել է, որ բարձր գնահատանքի է արժանի բոլոր անհատների և կազմակերպությունների ներդրումը, և հայտնել, որ Սամվել Կարապետյանի հետ որոշակի հարցերի շուրջ բանակցություններն անձամբ է վարել։