Հակակոռուպցիոն կոմիտեն 2025-ին վարույթ է սկսել 890, որոնցից 617-ը կարճվել է՝ մոտ 70%

Ազգային ժողովում Հայաստանի Հակակոռուպցիոն կոմիտեի 2025 թվականի գործունեության հաշվետվության քննարկման ժամանակ ընդդիմադիր «Հայաստան» խմբակցության քարտուղար, ՀՅԴ անդամ Արծվիկ Մինասյան նշել է, որ «հարուցվել է 890 վարույթ, որոնցից 617-ն արդեն կարճվել է, ինչը մոտավորապես 70%-ն է»։ Նա հարց ուղղել է գերատեսչության ղեկավար Արթուր Նահապետյանին.

Մինասյանը հետաքրքրվել է, թե ինչպե՞ս բացատրվում է այդ մեծ թիվը և քանի՞ն են կարճվել առանց արդարացված հիմքերի։ Նա նաև խնդրել է պարզաբանել՝ ինչ է ենթադրում հաշվետվությունում նշված «նախկին պաշտոնատար անձ» հասկացությունը։

Նահապետյանը պատասխանել է, որ 2025 թվականի ընթացքում քննվել է 2588 քրեական վարույթ, որոնցից կարճվել են 617-ը։ Պատգամավորը նաև հարցրել է, թե ինչպես է գնահատվում այն փաստը, որ կալանավորումը որպես խափանման միջոց կիրառելու 243 միջնորդություններից բավարարվել են միայն 102-ը։

Նահապետյանը հստակ և պարզ պատասխան չի տվել՝ նշելով միայն, որ կալանավորման 102 միջնորդությունների հետ միասին կիրառվել են ևս 80 խափանման միջոցներ՝ տնային կալանքի և վարչական հսկողության տեսքով։