Երևանն ու Բաքուն ապրանքների ցանկեր են փոխանակում փոխադարձ առևտրի համար. Փաշինյան

Հայաստանն ու Ադրբեջանը քննարկում են փոխադարձ առևտրի ընդլայնման հնարավորությունները։ Նիկոլ Փաշինյանը հայտարարել է, որ կողմերն արդեն փոխանակում են պոտենցիալ ապրանքների ցանկերը, իսկ ադրբեջանական վառելիքի ներկրման շուկան ազատականացվում է բոլոր տնտեսվարողների համար։

Կառավարությունում հունվարի ութին կայացած ճեպազրույցի ժամանակ վարչապետը մանրամասներ է ներկայացրել հարևան երկրի հետ տնտեսական հարաբերությունների զարգացման ընթացքից։ Ըստ Փաշինյանի՝ ներկայումս ուսումնասիրության փուլում է գտնվում այն հարցը, թե կոնկրետ ինչ ապրանքատեսակների առքուվաճառքով են հետաքրքրված երկու երկրները։ Սա հուշում է, որ գործընթացը էներգակիրներից զատ կարող է ներառել տնտեսության այլ ճյուղեր ևս։

Անդրադառնալով ադրբեջանական բենզին ներկրող առաջին ընկերությունների ընտրությանը՝ վարչապետը պարզաբանել է, որ նախաձեռնությունը եղել է Ադրբեջանի փոխվարչապետինը։ Հայկական կողմը խնդիր է ունեցել գտնելու այնպիսի գործընկերների, որոնք հարցը չեն քաղաքականացնի և չեն փորձի տպավորություն ստեղծել, թե կառավարությունը պարտադրում է թշնամուց վառելիք գնել։ Փաշինյանը նշել է, որ մտավախություններն անհիմն չէին, քանի որ սկզբնական շրջանում եղել են վաճառքից հրաժարվողներ։

Այժմ, երբ մեխանիզմը գործարկված է, վարչապետը հայտարարել է սահմանափակումների վերացման մասին։ Նրա խոսքով՝ շուկան բաց է, և ցանկացած գործարար կարող է օգտվել Ադրբեջանից վառելիք ներկրելու հնարավորությունից։

Հիշեցնենք, որ դեկտեմբերին Վրաստանի տարածքով Հայաստան էր մտել ադրբեջանական SOCAR ընկերության վառելիքով բեռնված առաջին գնացքը, իսկ առաջիկա օրերին սպասվում է նոր խմբաքանակ։