Հերձվածի վտանգ․ Մայր Աթոռը կոշտ արձագանքել է Փաշինյանի և եպիսկոպոսների համաձայնագրին

Մայր Աթոռ Սուրբ Էջմիածինը խստորեն դատապարտել է վարչապետ Նիկոլ Փաշինյանի և տասը եպիսկոպոսների ստորագրած փաստաթուղթը՝ այն որակելով որպես ոտնձգություն Սահմանադրության դեմ։ Հոգևոր կենտրոնը զգուշացնում է, որ պետության նման միջամտությունը կարող է հանգեցնել եկեղեցու պառակտմանը։

Արձագանքելով կառավարության ղեկավարի նախաձեռնությանը՝ Մայր Աթոռը հայտարարել է, որ եկեղեցական բարենորոգումների պատրվակով իշխանությունը խախտում է Եկեղեցու՝ օրենքով և միջազգային նորմերով ամրագրված անկախությունը։ Սուրբ Էջմիածինը անընդունելի է համարել հոգևորականների նկատմամբ գործադրվող ճնշումները և շեշտել, որ եկեղեցական կյանքի կանոնակարգումը պետք է իրականացվի բացառապես ներեկեղեցական կառույցների, այլ ոչ թե դրսից պարտադրված մարմինների միջոցով։

Հայտարարության մեջ առանձնահատուկ ուշադրություն է դարձվել նախաձեռնությանը միացած տասը եպիսկոպոսների վարքագծին։ Մայր Աթոռը փաստում է, որ այդ հոգևորականները տևական ժամանակ խուսափել են Ամենայն Հայոց Կաթողիկոսի և Գերագույն հոգևոր խորհրդի հետ հանդիպումներից՝ մերժելով երկխոսության բոլոր հրավերները։

Եկեղեցին հստակեցրել է, որ վարչապետի հովանու ներքո ստեղծված կառույցը «ինքնահռչակ խորհուրդ» է և չունի լիազորություններ՝ զբաղվելու Նվիրապետությանը վերապահված հարցերով։ Մայր Աթոռը իր խոսքը եզրափակել է լրջագույն նախազգուշացմամբ՝ նման անխոհեմ քայլերը տանում են դեպի հերձված, ինչը ցավալի և ծանր հետևանքներ կունենա ամբողջ ժողովրդի համար։