Թթուջուր-Նավուրն ավարտված է. Բերդից Երևան ճանապարհը կրճատվեց 1 ժամով

Կառավարությունը հայտարարում է ճանապարհաշինական տարվա հաջող ավարտի մասին. տարեկան պլանը կկատարվի մինչև ձմռան գալը։ Միաժամանակ Տավուշի մարզում գործարկվող նոր ճանապարհները ռազմավարական նշանակություն ունեն՝ էապես կրճատելով համայնքների միջև հեռավորությունը։

Նոյեմբերի 20-ի կառավարության նիստում քննարկվեց տարեկան 500 կմ ճանապարհ կառուցելու խոստման կատարման ընթացքը։ ՏԿԵ նախարար Դավիթ Խուդաթյանը վարչապետ Նիկոլ Փաշինյանին զեկուցեց, որ նշաձողը կհաղթահարվի մինչև դեկտեմբերի մեկնարկը։ Նախարարի տվյալներով՝ այս պահին արդեն իսկ ավարտված է 475 կմ հատվածը, և, հավատարիմ մնալով պայմանավորվածությանը, դեկտեմբեր ամսին ասֆալտապատման աշխատանքներ չեն իրականացվի։

Վարչապետն իր հերթին շեշտադրեց հատկապես Տավուշի մարզում իրականացված խոշոր ծրագրերի կարևորությունը։ Նա առանձնացրեց Թթուջուր-Նավուր և Գանձաքար-Իծաքար ճանապարհահատվածները, որոնք լուծում են առնվազն 25-30 տարվա խնդիր։ Նիկոլ Փաշինյանը նկատեց, որ Թթուջուր-Նավուր ճանապարհը, որը նախկինում երբեք ասֆալտապատ չի եղել, այժմ ամենակարճ երթուղին է և Բերդից Երևան հասնելու ժամանակը կրճատում է մեկ ժամով։

Այս նախագծերի շնորհիվ Բերդ խոշորացված համայնքն այժմ կապված է արտաքին աշխարհի հետ երեք գործող ճանապարհներով։ Կառավարության ղեկավարը նաև տեղեկացրեց, որ ծրագրերն այսքանով չեն սահմանափակվում. օրակարգում է նաև նախկինում միակ գործող Այգեհովիտ-Վազաշեն-Պառավաքար ճանապարհի հիմնանորոգումը, ինչը կամբողջացնի մարզի տրանսպորտային ենթակառուցվածքների արդիականացումը։