VERELQ-ը ներկայացնում է հայաստանյան մամուլի ամենաուշագրավ հրապարակումները:
«Հրապարակ» օրաթերթը գրում է. «Դվին» հյուրանոցային համալիրում այսօր տեղի են ունենալու Սամվել Կարապետյանի նախաձեռնությամբ հիմնադրված «Մեր ձեւով» ժողովրդական շարժման շնորհանդեսը եւ համակարգող խորհրդի մամուլի ասուլիսը։ Չնայած նախաձեռնողները որոշել են մինչեւ վերջին պահն ինտրիգ պահել եւ չմանրամասնել իրենց անելիքների եւ մարտավարության ու հատկապես` քաղաքական ուժի անդամների մասին, սակայն տեղեկացանք, որ համակարգող խորհրդի գլխավոր պատասխանատուն Նարեկ Կարապետյանն է՝ «Տաշիր» ընկերությունների խմբի փոխնախագահը, Կարեն Կարապետյանի կրտսեր որդին։ Իսկ այսօր խումբը հայտարարելու է առաջիկա անելիքների, իրենց տեսլականի մասին, հայտարարվելու է, որ շարժումն ապաքաղաքական է, ընդգրկվելու են արհեստավարժ մասնագետներ՝ բոլոր ոլորտներից, որոնք ախտորոշելու են իրավիճակը եւ արձանագրելու են առաջնահերթությունները՝ տնտեսական, սոցիալական եւ այլ ոլորտների վերաբերյալ, որոնք անհրաժեշտ են երկրում դրական փոփոխությունների հասնելու համար։ Այդ ամենից հետո կգա քաղաքական հանգուցալուծման պահը, շեշտելու են, որ պարտադիր չէ՝ այն մարդիկ, ովքեր այսօր շարժման մաս են կազմելու, տեղ ունենան քաղաքական թիմում։
«Հրապարակ» օրաթերթը գրում է. Երեկ հայտնի դարձավ, որ ԱՄՆ-ում ՀՀ դեսպանի առաքելությունն ավարտած Լիլիթ Մակունցը կնշանակվի վարչապետի գլխավոր խորհրդական։ Մինչդեռ ամիսներ շարունակ մեզ տեղեկություններ էին հասնում, որ Փաշինյանի անգլերենի երբեմնի ուսուցիչ Մակունցն ամեն ինչ արել է, որ ԱՄՆ-ում դեսպանի կարգավիճակում մնա կամ գոնե այլ երկրում շարունակի դիվանագիտական գործունեությունը։ Մի հարցում վստահ են, որ չնայած Մակունցի՝ ԱՄՆ-ում գրանցած ձախողումներին, Փաշինյանը նրա նկատմամբ առանձնահատուկ վերաբերմունք ունի, եւ չի բացառվում, որ հաջորդ ընտրություններից հետո, եթե ՔՊ-ն վերարտադրվի, Մակունցին դիտարկի որեւէ այլ բարձր պաշտոնում։
«Ժողովուրդ» օրաթերթը գրում է. «2026 թվականի համապետական ընտրություններին ընդառաջ ակտիվացել են նաեւ արտախորհրդարանական ուժերը։ «Ապրելու երկիր» կուսակցության համահիմնադիր Մեսրոպ Առաքելյանը «Ժողովուրդ» օրաթերթի հետ զրույցում նշեց, որ իրենց գործունեությունը հիմնականում ծավալվում է մարզերում, մասնավորապես՝ Փարաքարում, Նոյեմբերյանում, Տաթեւում, որտեղ կուսակցությունն արդեն իշխանություն ունի։ Առաքելյանի խոսքով՝ հանդիպումների եւ քննարկումների նպատակը թիմի ընդլայնումն ու նոր համախոհների ներգրավումն է.
«Մենք վստահ ենք, որ կան բազմաթիվ կարող անհատներ, որոնք պետք է պատասխանատվություն ստանձնեն այս ծանրագույն իրավիճակում։ Նպատակն էլ խորհրդարանական ընտրություններին պատրաստ լինելն է»։ Մեսրոպ Առաքելյանը նշեց՝ թեկնածուի հարցը դեռեւս որոշված չէ. «Ժամանակ ունենք առավել արդյունավետ մեխանիզմով հանդես գալու համար», – ասաց նա՝ չբացառելով նաեւ այլ ուժերի հետ համախմբումը, եթե լինի արժեքների ու գաղափարների շուրջ համակարծություն։ Փողոցային պայքար այս պահին չեն պլանավորում, բայց նաեւ չեն բացառում։
Անդրադառնալով Վաշինգտոնում նախաստորագրված խաղաղության պայմանագրին՝ Առաքելյանը ընդգծեց, որ Նիկոլ Փաշինյանը բաց է թողել բացառիկ հնարավորությունը՝ Բաքվում պահվող հայ գերիների հարցը տեղում բարձրացնելու համար։ «Գերիների վերադարձի համար սա լավագույն շանսն էր։ Մենք արդեն հույս չունենք ՀՀ իշխանություններից եւ աշխատում ենք միջազգային հանրության հետ՝ ներկայացնելով ինչպես Ռուբեն Վարդանյանի, այնպես էլ մյուսների վերաբերյալ կեղծ դատավարությունները։ Միջազգային ճնշումն այս պահին միակ հնարավորությունը կլինի մեր գերիներին ազատելու համար», – նշեց նա»։
«Հրապարակ» օրաթերթը գրում է. Մեր տեղեկություններով՝ մոտ 2 ամիս առաջ աղմկահարույց ձերբակալություն է տեղի ունեցել ՀՀ դիվանագիտական կորպուսում, որը փորձել են գաղտնի պահել։ Ավստրիայում ՀՀ հյուպատոս ոմն Աշխեն Ալեքսանյանի՝ Հայաստան վերադառնալիս, օդանավակայանում ձերբակալել են: Երիտասարդ կնոջ մոտ փաստաթղթեր են հայտնաբերել եւ կասկածել Ադրբեջանի օգտին լրտեսություն իրականացնելու մեջ։ Դրանից հետո ԱԱԾ-ն մի ամբողջ օր խուզարկություն է իրականացրել ԱԳՆ շենքում` համակարգիչներն են ուսումնասիրվել, փաստաթղթեր են զննվել։ Եվ որոշվել է այս ձերբակալությունը գաղտնի պահել, քանի որ այն մեծ սկանդալի առիթ կարող է դառնալ։
Բանն այն է, որ որեւէ մեկին դիվանագիտական կորպուսում բարձր պաշտոնի նշանակելուց առաջ ԱԱԾ-ն ստուգում է նրա անցած ուղին, կասկածելի կապերը եւ այլն: Նշանակումն արվում է միայն համապատասխան մանրակրկիտ ուսումնասիրությունից հետո, որի արդյունքները զեկուցում են նշանակողին։ Հիմա ստացվում է, որ կա՛մ թերացել են, ինչը պատասխանատվության հարց է առաջացնում, կա՛մ էլ նշանակողներն են աչք փակել ինչ-ինչ հանգամանքների վրա։ Եվ ծածկադմփոցի շրջանակներում էլ համացանցից, բոլոր բաց աղբյուրներից ուղղակի վերացրել են Աշխեն Ալեքսանյանի վերաբերյալ տեղեկատվությունն ու անգամ նշանակման մասին պաշտոնական լուրը։ Բայց ԱԳՆ համակարգի հին աշխատակիցներից մեկը մեզ հետ զրույցում ասաց, որ շատ լավ է ճանաչում Աշխենին, նա սկզբում քաղծառայողի հաստիքի վրա էր, ապա աշխատանքի անցավ ԱԳՆ հյուպատոսական բաժնում եւ դիվանագետի կոչում ստացավ, որից հետո այլեւս տեղեկություն չունի նրա մասին:
«Հրապարակ» օրաթերթը գրում է. Դեռեւս տարեսկզբին լրատվամիջոցները գրեցին, որ Արթիկի ՔՊ-ական համայնքապետ Անանիկ Ոսկանյանը, որը գեներալ Մանվելի սանիկն է, նախկինում սրսուռ ՀՀԿ-ական, որոշել էր ապամոնտաժել համայնքում 1965-ին կառուցված՝ Հայրենական մեծ պատերազմում զոհվածներին նվիրված հուշակոթողը: Լուրն աղմուկ բարձրացրեց եւ տարածվեց անգամ ռուսական լրատվամիջոցներում՝ այն դիտարկվելով հայ-ռուսական խաթարված հարաբերությունների ծիրում: Ավելի ուշ հնչեցին պարզաբանումներ, որ հուշարձանը նախատեսվում է ապամոնտաժել քաղաքի կենտրոնում գտնվող Ազատության հրապարակից, տեղափոխել եւ վերականգնել քաղաքի մեկ այլ հատվածում՝ Բարեկամության այգում։ Սակայն պարզվում է՝ ռուսների համար համոզիչ չեն եղել այդ պարզաբանումները, եւ ամիսներ անց նրանք որոշել են պատժել Արթիկի համայնքապետին։ Վերջերս նա մեկնել է ՌԴ՝ հարազատներից մեկի միջոցառմանը մասնակցելու, նրան երկու օր պահել են օդանավակայանում, ապա հայտնել, որ իր մուտքը Ռուսաստանի Դաշնություն 50 տարով արգելված է։
«Ժողովուրդ» օրաթերթը գրում է. «Երեւանի տրանսպորտում տիրող իրավիճակը, հատկապես սակագնի թանկացումից հետո, օրեցօր ավելի լարված է դառնում։ Եթե իշխանությունը բարձր գինը հիմնավորում էր ծառայության որակի բարձրացմամբ, ապա իրականությունը հակառակն է. քաղաքացիները բախվում են ոչ միայն անհարմարությունների, այլ նաեւ նվաստացնող վերաբերմունքի։ Վերջին օրերին Երեւանի ավագանու անդամ Մեսրոպ Մանուկյանը եւ բլոգեր Արթուր Չախոյանը դիտարկումներ են արել տրանսպորտում։ Նրանք փաստել են՝ Տիգրան Ավինյանի վարչակազմի ուղարկած վերահսկողները քաղաքացիների հետ խոսում են ոչ հարգալից տոնով, հաճախ՝ ագրեսիվ եւ «քյարթու» վարքագիծ դրսեւորում։ Տուգանքներ են գրանցվում նույնիսկ առանց ստուգման։ Չախոյանն ինքը երեկ տուգանվել է՝ առանց որեւէ ստուգման կամ հիմնավորման։
Հասարակական վերահսկողությունը, ըստ ամենայնի, վերածվել է քաղաքացիների դեմ ուղղված մեխանիզմի։ Սա լուրջ ահազանգ է. քաղաքապետարանը պարտավոր է երաշխավորել ոչ միայն վճարային կարգապահություն, այլ նաեւ արժանապատիվ վերաբերմունք իր քաղաքացիների նկատմամբ։ Թանկացած տոմսի դիմաց երեւանցին ակնկալում է ոչ թե ճնշում ու կասկած, այլ անվտանգ, հարգալից ու որակյալ սպասարկում: Մինչդեռ այսօր Երեւանում գործ ունենք տրանսպորտային քաղաքականության տապալման եւս մեկ դրսեւորման հետ, որի քաղաքական պատասխանատվությունը լիովին կրում է Տիգրան Ավինյանը. մարդ, որ արդեն ասոցացվում է ստախոսության հետ: Մինչ այս քարոզում էր՝ «ասե՛ք՝ կանե՛նք», հիմա ասում ենք՝ քո խոստացած տրոլեյբուսները գնի՛ր, ասում է՝ փող չկա, ասում ենք՝ մահվան վերելակները փոխի՛ր, ասում է՝ փող չկա: Ասում ենք՝ մարդկանց մի՛ նվաստացրու, նա ուղարկում է թաղային խուժան եւ «ախրանիկ» հիշեցնող զազրելի ժամանակների կերպարներին հանրային տրանսպորտ՝ նսեմացնելու ՀՀ քաղաքացիներին»։
«Ժողովուրդ» օրաթերթը գրում է. «Երեկ Վ. Ա. Ֆանարջյանի անվան Ուռուցքաբանության ազգային կենտրոնում մոտ 8 ժամ ընթացավ տնօրենի ընտրության գործընթացը, որի արդյունքում մրցույթում «հաղթեց» Կարեն Ծառուկյանը: Իսկ ի՞նչ տեղի ունեցավ այդ 8 ժամվա ընթացքում, որի արդյունքում ՀՀ առողջապահության նախարար Անահիտ Ավանեսյանի և ՔՊ-ի «սրտի» թեկնածու Կարեն Ծառուկյանը դարձավ տնօրեն, երբ իր հետ առաջադրվել էին ևս 3 թեկնածուներ, որոնք հաղթահարել էին քննությունների անհրաժեշտ շեմը:
«Ժողովուրդ» օրաթերթի լրագրողը, որպես դիտորդ, ներկա է եղել տնօրենի մրցույթին. նախարար Ավանեսյանի տարօրինակ որոշմամբ՝ մրցույթի ընթացքում ներկա դիտորդները քննությանը կարող էին հետևել միայն նախարարության մի աշխատասենյակից` հեռուստացույցով: Այսինքն՝ այն սենյակ, որտեղ մրցույթն էր իրականացվում, արգելվեց մուտք ունենալ, ծանոթանալ փաստաթղթերին, իրականացնել մասնագիտական գործունեություն. այն թափանցիկության անվան տակ քողարկված մրցույթ էր՝ էկրանի հետևում: Եվ այսպես՝ տնօրենի թեկնածուները 4-ն էին՝ Վ. Ա. Ֆանարջյանի անվան Ուռուցքաբանության ազգային կենտրոնի տնօրենի ժ/պ Կարեն Ծառուկյանը, «Առողջության իրավունք» իրավապաշտպան ՀԿ-ի նախագահ Անուշ Պողոսյանը, ՈՒԱԿ-ի անոթային վիրաբուժության բաժանմունքի վարիչ Գուրգեն Գրիգորյանը, Ուռուցքաբան, վիրաբույժ Գագիկ Համբարձումյանը:
Հանձնաժողովը բաղկացած էր 7 անդամից, նախագահը Անահիտ Ավանեսյանն էր: Նախարարը ամեն բան արել էր հանձնաժողովը ղեկավարելու համար՝ իմանալով, որ նախ Կառավարության նիստի պետք է մասնակցի, իսկ արդեն ավելի ուշ Կառավարությունում զեկույց ունի. ակնհայտ երևում է, որ Ավանեսյանի համար գլխավոր հարցը իրենց «սրտի» թեկնածուին ամեն գնով «անցկացնելն» էր: Նախ գրավոր քննություն տեղի ունեցավ, որի ժամանակ Անուշ Պողոսյանն ու Կարեն Ծառուկյանը 100 տոկոս արդյունք գրանցեցին, մյուսները՝ 96 ու 98: Այնուհետեւ սկսվեց ամենադաժան փուլը` բանավոր քննությունը, որի ժամանակ ակնհայտ երևում էր, որ և՛ Ավանեսյանը, և՛ հանձնաժողովի մյուս անդամները լարված էին: Առաջինը սկսեցին քննել Անուշ Պողոսյանին. բանավոր քննությունը տևեց 1 ժամ 55 րոպե, որի ժամանակ, ինչպես քննիչները կքննեին, այդպես քննեցին Պողոսյանին: Հանձնաժողովի անդամները անգամ հարց ուղղեցին նրան, թե իրենց այդքան քննադատելուց հետո ինչպես է պատրաստվում իրենց հետ աշխատել. սրանից հստակ երևաց, որ Պողոսյանն արդեն «սև ցուցակում» է: Բայց նրա պրոֆեսիոնալիզմը չկարողացան չգնահատել:
Այնուհետեւ քննեցին Գագիկ Համբարձումյանին, նրանից հետո՝ Գուրգեն Գրիգորյանին, ավելի մեղմ ու ավելի մասնագիտական հարցերով: Բանավոր քննության փուլից հետո Ավանեսյանը հայտարարեց, որ պետք է Կառավարություն գնա, բոլորը պիտի սպասեն իրեն՝ նոր սկսեն Կարեն Ծառուկյանին քննել: Իհարկե սպասեցին: Իսկ Ծառուկյանն ավելի պատրաստված էր ու հստակ երևում էր, որ «աշխատել» էին նրա հետ: Վերջում հայտարարեցին, որ Ծառուկյանը միակ թեկնածուն է, որ հաղթահարել է անցողիկ շեմը, ու նա է նշանակվելու տնօրենի պաշտոնին: Սակայն Անուշ Պողոսյանը հայտնեց, որ բողոքարկում է քննության արդյունքները, քանի որ համաձայն չէ հանձնաժողովի որոշմանը: Իհարկե, ձևական նորից հանձնաժողով կկազմակերպեն, կլսեն քննության ձայնագրությունը, և դրանով թերևս ամեն ինչ կավարտվի: Իսկ վերջում, իհարկե, կրկին «կհաղթի» Ծառուկյանը, քանի որ վերջնարդյունքը «ի վերուստ» որոշված էր: Մրցույթն ուներ ձևական բնույթ. իրականում ոչինչ էլ թափանցիկ չէր»։
