Հայաստանը ֆինանսապես կաջակցի նոր թռիչքուղիներ բացող ավիաընկերություններին

Ավիաընկերությունները, որոնք նոր թռիչքուղիներ կբացեն դեպի Հայաստանի միջազգային օդանավակայաններ, կստանան ֆինանսական աջակցություն պետությունից։ Այդ մասին ապրիլի 23-ին կառավարության նիստի ժամանակ հայտարարեց տարածքային կառավարման և ենթակառուցվածքների նախարար Դավիթ Խուդաթյանը՝ ներկայացնելով ուղևորափոխադրումների զարգացման աջակցության ծրագիրը։

Ծրագրի համաձայն, ավիափոխադրողները սուբսիդիաներ կստանան երկու տարեկանից բարձր յուրաքանչյուր ուղևորի համար, ով նոր ուղղությամբ կժամանի Հայաստան։ Աջակցության չափը կկազմի մոտ 38.5 դոլար՝ մեկ ուղևորի հաշվով Գյումրու «Շիրակ» օդանավակայանի համար և մոտ 51 դոլար՝ Երևանի «Զվարթնոց» օդանավակայանի համար։

Ծրագրին մասնակցելու կարևորագույն պայմանն է առնվազն մեկ նոր երթուղու պարտադիր բացումը դեպի Գյումրիի օդանավակայան։ Ընդ որում, յուրաքանչյուր ուղղության համար ֆինանսական աջակցությունը կտրամադրվի երկու տարի ժամկետով։

Նախարարը պարզաբանեց, որ «նոր ուղղություն» ասելով՝ նկատի են առնվում այն երթուղիները դեպի քաղաքներ, որտեղ թռիչքների մեկնարկից նախորդող 12 ամիսների ընթացքում ցանկացած ավիաընկերության չվերթերի քանակը չի գերազանցել 14-ը՝ ամառային և 10-ը՝ ձմեռային ժամանակահատվածում։

Վարչապետ Նիկոլ Փաշինյանն առանձնահատուկ ընդգծեց, որ ավիաընկերությունը կարող է դառնալ ծրագրի մասնակից՝ նույնիսկ նոր երթուղի բացելով միայն դեպի Գյումրի՝ առանց նոր ուղղությունների դեպի Երևան, բայց ոչ հակառակը։ «Կարևոր է, որ սա լինի նոր ուղղություն հատկապես Գյումրիի համար, և ոչ թե պարտադիր ամբողջ Հայաստանի համար։ Ցանկացած երթուղի, որը նախկինում չի սպասարկել Գյումրին, կներառվի այս ծրագրում», – նշեց կառավարության ղեկավարը։

Էկոնոմիկայի նախարար Գևորգ Պապոյանն իր հերթին ընդգծեց այս նախաձեռնության կարևորությունը զբոսաշրջության զարգացման համար՝ հիշեցնելով, որ բազմաթիվ երկրներ վարում են ագրեսիվ մարքեթինգային քաղաքականություն՝ նոր ավիաուղղություններ և զբոսաշրջիկներ գրավելու համար։

VERELQ-ը գրել էր, որ 2024 թվականի ընթացքում հայկական օդանավակայանները սպասարկել են 5 251 932 ուղևոր, ինչը փոքր-ինչ զիջում է 2023 թվականի ցուցանիշներին: Անցած տարվա ընթացքում երկրի ավիացիոն շուկա են մտել հինգ նոր ավիաընկերություն: