Կառավարությունն ընդլայնել է հարկային վերադարձի ենթակա ծախսերի ցանկը

ՀՀ վարչապետ Նիկոլ Փաշինյանը հայտարարել է համընդհանուր հայտարարագրման շրջանակներում սոցիալական կրեդիտների համակարգի էական ընդլայնման մասին։ Այժմ քաղաքացիները կկարողանան հետ ստանալ ոչ միայն մանկապարտեզների, դպրոցների, բուհերի և առողջապահական ապահովագրության ծախսերը, այլև արտադպրոցական կրթության վճարները։

Վարչապետի խոսքով, համակարգը թույլ է տալիս աշխատող քաղաքացիներին, որոնց աշխատավարձից գանձվել է եկամտային հարկ, տարեկան մինչև 100 000 դրամ հետ ստանալ կրթության և զարգացման ծախսերից։ Ցանկում ներառված են երաժշտական դպրոցները, արվեստի դպրոցները, գեղարվեստի դպրոցները, պարի ստուդիաները, լեզվի դասընթացները, սպորտային խմբակները, IT դասընթացները և ԿԳՄՍՆ-ի կողմից երաշխավորված այլ կրթական ծրագրերը։

«Մենք կոչ ենք անում ծնողներին իրենց երեխաներին ուղարկել տարբեր խմբակներ։ Պետությունը կփոխհատուցի այդ ծախսերը մինչև 100 000 դրամի չափով»,- ընդգծել է Փաշինյանը՝ նշելով, որ վերադարձն իրականացվում է վճարված եկամտային հարկից՝ այլ հարկային վերադարձի ծրագրերից հետո մնացորդի առկայության դեպքում։