Իրանի իշխանությունները հայտնել են ահաբեկչական խմբավորում ոչնչացնելու մասին

Իրանի իշխանությունները ահաբեկչական խմբավորում են ոչնչացրել երկրի հարավ-արևելքում գտնվող Սիստան և Բելուջիստան նահանգներում։ Հետախուզության վարչության և Իսլամական հեղափոխության պահապանների կորպուսի (ԻՀՊԿ) հետախուզական կազմակերպության համատեղ հայտարարության համաձայն՝ ձերբակալվել է 19 զինյալ, գրում է ՏԱՍՍ-ը։

«Օտարերկրյա լրտեսական ծառայությունները փորձում են ապակայունացնել իրավիճակը երկրում։ Հանցավոր խմբի ձերբակալված զինյալները բազմաթիվ ահաբեկչություններ են իրականացրել և փորձել են թշնամություն սերմանել էթնիկ և կրոնական հողի վրա։ Վերջին ամիսներին նրանց հաջողվել է տեղեկատվական տեխնոլոգիաների մասնագետներին ներգրավել իրենց հանցավոր գործունեության մեջ՝ նախապատրաստելու էթնիկ և կրոնական առաջնորդների սպանությունները, հրահրելու անկարգություններ, հարձակումներ բանակի օբյեկտների և իրավապահ մարմինների վրա»,- ասվում է զեկույցում։

Խոսքը «Իրանի ժողովրդի մոջահեդների կազմակերպություն» խմբավորման մասին է։ 1980-ականներին զինված պայքար է մղել Իսլամական Հանրապետության ղեկավարության դեմ։ Խումբը հետագայում հաստատվել է Ֆրանսիայում և ԱՄՆ-ում, գործել է Իրաքից Սադամ Հուսեյնի օրոք (1979-2003) և օգտագործվել Իրանի դեմ պատերազմում։

Կազմակերպությունը ահաբեկչական է ճանաչվել ոչ միայն Իրանում, այլեւ Արեւմուտքում, սակայն հետագայում ԱՄՆ-ն ու Մեծ Բրիտանիան այն հանել են իրենց սեւ ցուցակից։ Խումբը բացահայտ հայտարարում է, որ իր գործունեության նպատակը Իրանի ներկայիս ղեկավարության տապալումն է։