Ալեն Սիմոնյանը ընդդիմությանը խորհուրդ տվեց այլընտրանքային պետություն ստեղծել

Հայաստանի խորհրդարանի նախագահ Ալեն Սիմոնյանն անլուրջ է համարում այլընտրանքային խորհրդարանական քննարկումներ անցկացնելու ընդդիմության նախաձեռնությունը։ Այս մասին այսօր՝ սեպտեմբերի 12-ին, նա հայտարարեց ԱԺ-ում լրագրողների հետ զրույցում։

Ընդդիմության նման քայլերը, նրա կարծիքով, չեն վնասի Ազգային ժողովի աշխատանքին։

«8-րդ գումարման Ազգային ժողովն ունի ամենաբարձր լեգիտիմությունը: Սրա հետ մեկտեղ, ժամանակակից Հայաստանի պատմության մեջ ներկայիս ընդդիմությունն ամենաոչ պոպուլյարն է։ Նրանց քայլերը չեն խանգարի, կարող են թեկուզ այլընտրանքային պետություն ստեղծել»,- ասաց Սիմոնյանը։

Նա ընդդիմությանը կոչ արեց դադարեցնել պատրանքներով առաջնորդվելը և զուգահեռ իրականություն ստեղծելը, համարելով դա անլուրջ մոտեցում. «Ասացին, որ իշխանությունը հիմա փողոցում է, դուրս եկան խորհրդարանից և մենակ հայտնվեցին։ Ես նրանց ասել եմ և կրկնում եմ՝ նրանք այլ այլընտրանք չունեն, քան խորհրդարան վերադառնալը»,- ասաց Սիմոնյանը։

Բանախոսը նշեց, որ խորհրդարանը քննարկելու է ՍԴ անդամների թեկնածությունները, սահմանների հարցը։ «Դրանք ուղղակիորեն կապված են պետության հետ։ Ինչո՞ւ սա «իրենց օրակարգը» չէ։ Միգուցե իրենց օրակարգում կարող են լինել միայն իրենց ղեկավարներին քրեական հետապնդումից փրկելու հարցե՞րը»,- հավելեց Սիմոնյանը: