Ռոուհանի. Իրանն ու Թուրքիան կարող են առաջատար դեր կատարել ահաբեկչության դեմ պայքարում

Թեհրանն ու Անկարան կարող են առաջատար դեր կատարել տարածաշրջանում ահաբեկչության դեմ պայքարում, մասնավորապես՝ Սիրիայում եւ Իրաքում: Irna-ի փոխանցմամբ՝ այս մասին ՄԱԿ-ի Գլխավոր վեհաժողովի շրջանակում Թուրքիայի նախագահ Ռեջեփ Թայիփ Էրդողանի հետ հանդիպման ժամանակ հայտարարել է Իրանի նախագահ Հասան Ռոուհանին:

Նրա խոսքով՝ Իրանը «միշտ բարեկամ եւ եղբայրական երկրի՝ Թուրքիայի կողքին կլինի»:

«Իրանը պատրաստ է Թուրքիայի հետ հարաբերությունները զարգացնել բոլոր ոլորտներում, մասնավորապես՝ էներգետիկայի, տրանսպորտի եւ արդյունաբերության»,- հավելել է նա:

Ռոուհանին ընդգծել է, որ երկու երկրների մասնավոր հատվածներն էլ երկկողմ համագործակցության զարգացմանն ավելի մեծ աջակցության կարիք ունեն:
Անդրադառնալով Թուրքիայում հուլիսի 15-ին տեղի ունեցած հեղաշրջման փորձին՝ Ռոուհանին հայտարարել է, որ Թեհրանը խորապես տխրել է այդ իրադարձության առիթով: