Նարեկ Մանթաշյանը կմնա կալանքի տակ

«Քաղաքացիական գիտակցություն» ՀԿ-ի նախագահ Նարեկ Մանթաշյանը կմնա կալանքի տակ: Այս մասին հայտնում է փաստաբան Ալեքսանդր Կոչուբաևը:

"Արդարադատությունը մնաց Մարիոթի հյուրանոցում: Անկեղծ, կանխտեսելի էր. Նարեկ Մանթաշյանը հո Խաչատուր Սուքիասյանի եղբայրը չէ, որ Կ. Ֆարխոյանը ազատ արձակի, վերաքննիչը կալանավորի՝ Կ. Ֆարխոյանը կրկին ազատ արձակի",- գրել է փաստաբանը:

Հիշեցնենք, "Հայաստան" դաշինքի անդամ Նարեկ Մանթաշյանը 2020 թվականի նոյեմբերի 9-ի լույս 10-ի գիշերը, երբ ստորագրվեց Արցախում պատերազմը դադարեցնելու եռակողմ հայտարարությունը, մի խումբ այլ քաղաքացիների հետ հավաքվել էին Կառավարության, Ազգային ժողովի շենքի մոտ և մուտք գործել ներս: Նրան մեղադրանք է առաջադրվել ՀՀ ՔՕ 225-րդ հոդվածի 1 -ին և 2-րդ մասերով, այն է՝ զանգվածային անկարգություններ կազմակերպելը և դրանց ժամանակ բռնություն գործադրելը ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը: Վերջինս մեղադրվում է նաև Կառավարության շենքից հափշտակություն (ՀՀ դրոշ) կատարելու համար: