ԱՄՆ վարչակազմը քննարկել է Թուրքիայի «Ինջիրլիք» բազայից ռազմական սպառազինությունը դուրս բերելու հնարավորությունը՝ կապված Սիրիայում Անկարայի ռազմական գործողության անցկացման հետ, հայտնում է The New York Times-ը: Պարբերականի աղբյուրների փոխանցմամբ՝ անցած հանգստյան օրերին «ԱՄՆ Պետքարտուղարության եւ էներգետիկայի նախարարության աշխատակիցները առանց ավելորդ աղմուկի քննարկել են տակտիկական միջուկային զենքի գրեթե 50 միավորի դուրսբերման ծրագրերը, որոնք «Ինջիրլիք» բազայում վաղուց պահվում են Միացյալ Նահանգների վերահսկողության ներքո»: Աղբյուրներից մեկի կարծիքով՝ բազայից նշված սպառազինության տեղափոխումը «փաստացի կնշանակի Թուրքիայի եւ ԱՄՆ-ի միջեւ դաշինքի ավարտ»: Հրապարակման մեջ արձանագրվում է, որ ամերիկյան կողմի կարծիքով՝ վտանգավոր է միջուկային սպառազինությունը թողնել բազայում:
