Հայաստանի և Ադրբեջանի արտաքին գործերի նախարարներ Զոհրաբ Մնացականյանի ու Էլմար Մամեդյարովի հանդիպման նպատակն է պահպանել բանակցությունների դինամիկան: Այս մասին լրագրողների հետ ճեպազրույցում այսօր հայտարարեց ՀՀ արտաքին գործերի նախարար Զոհրաբ Մնացականյանը: Նրա խոսքով՝ այս պահին հարկ է սպասել երկու երկրների ԱԳ նախարարների հանդիպմանը, որի նպատակը ինքն արդեն հնչեցրեց: Իսկ ահա հարցը՝ կարելի՞ է սպասել նաև Հայաստանի և Ադրբեջանի ղեկավարների հանդիպում, մնաց անպատասխան: Հիշեցնենք, Մնացականյան–Մամեդյարով հանդիպումը տեղի կունենա հուլիսի 11-ին Բրյուսելում: Այդ մասին ավելի վաղ հայտարարվել էր ՀՀ արտգործնախարարության Twitter-ի պաշտոնական միկրոբլոգում:
