Հայաստանի դեմ հիբրիդային պատերազմն այսօր չի սկսվել, այն սկսվել է շատ վաղուց։ Այս մասին հայտարարեց ՀՀ խորհրդարանի նախագահ Ալեն Սիմոնյանը՝ մեկնաբանելով Ուկրաինայի նախագահ Վոլոդիմիր Զելենսկու՝ Հայաստան հնարավոր այցի վերաբերյալ հարցին և անդրադառնալով երկրի դեմ մղվող հիբրիդային պատերազմին։ «Հայաստանի դեմ հիբրիդային պատերազմը շարունակվում է երկար ժամանակ, շատ ինտենսիվ և բացահայտ։ Տարբեր, հատկապես ռուս քարոզիչները Հայաստանում հայկական աղավաղված ազգանուններով հաճախ են հայտարարում հանրահավաքներ ու երթեր»,- ասաց նա՝ հավելելով, որ ներկա պայմաններում հիբրիդային պատերազմի մասին խոսելն ավելորդ է, դրա գոյությունն արդեն ակնհայտ է։ «Ինչ վերաբերում է (Ուկրաինայի նախագահի) այցին, ապա այս պահին նման տեղեկություն չկա, բայց կարծում եմ, որ նման այցի դեպքում այն կլինի տարածաշրջանային։ Այց չի լինելու միայն Հայաստան»,- ասաց նա։
