Մայիսի 25-ին Սյունիքի մարզ աշխատանքային այցի շրջանակներում Հայաստանում Ռուսաստանի արտակարգ և լիազոր դեսպան Սերգեյ Կոպիրկինը հանդիպեց Մեղրիի քաղաքապետ Բագրատ Զաքարյանի հետ։ Այցի մանրամասները հայտնում են դիվանագիտական առաքելության մամուլի ծառայությունից։ Քաղաքի ղեկավարը դիվանագիտական առաքելության ղեկավարին ծանոթացրել է համայնքի կյանքին, ներկայացրել նաև դրա հետագա զարգացման հեռանկարային ուղղություններ։ Զաքարյանը շնորհակալություն է հայտնել ռուսական կողմի աջակցությամբ Մեղրիում իրականացվող սոցիալ-տնտեսական, մշակութային, հումանիտար և կրթական ծրագրերի համար։ Անվտանգության ապահովման տեսանկյունից կարևորելով ռուս սահմանապահների ներկայությունը՝ քաղաքապետը երախտագիտություն է հայտնել տարբեր խնդիրների լուծման գործում ցուցաբերած աջակցության համար։ Կոպիրկինն իր հերթին ընդգծել է ռուս-հայկական դաշնակցային հարաբերությունների կարևորությունը աշխարհաքաղաքական բարդ իրավիճակի ֆոնին։ Դիվանագիտական առաքելության ղեկավարն ընդգծել է, որ Ռուսաստանը շարունակում է զգալի դերակատարում ունենալ Հայաստանի անվտանգության ապահովման գործում՝ նշելով, որ Հայաստանի կառավարության հետ համաձայնությամբ տարածաշրջանի սահմաններին տեղակայված ռուս սահմանապահները նշանակալի ներդրում ունեն կայունության պահպանման գործում։ Կոպիրկինը նշել է միջտարածաշրջանային կապերի հետագա ամրապնդման առկա նախադրյալները, այդ թվում՝ մշակույթի և կրթության ոլորտում։ Զաքարյանի ուղեկցությամբ Կոպիրկինն այցելել է Հայաստանում ՌԴ ԱԴԾ սահմանապահ վարչության Մեղրիի սահմանապահ ջոկատ, որտեղ ծանոթացել է ծառայության պայմաններին և Հայաստանի սահմանի այս հատվածում տիրող իրավիճակին։