Հուլիսին հնարավոր է հանդիպեն ՀՀ և Ադրբեջանի արտգործնախարարները: Այս մասին Ազգային Ժողովում լրագրողների հետ ճեպազրույցում հայտարարեց ՀՀ արտաքին գործերի նախարար Էդվարդ Նալբանդյանը: Նա չի բացառել իր և Էլմար Մամեդյարովի հանդիպումը, որի մասին ավելի վաղ արդեն հայտնել էր Էստոնիայի ԱԳ նախարար Սվեն Միկսերի հետ համատեղ ասուլիսում: Ի դեպ, արձագանքելով հարցին, թե Արցախը դուրս է բանակցություններից և ինչ է արվում այս ուղղությամբ, ՀՀ արտգործնախարարը նշեց. «Մի օր կհրապարակվեն այդ բոլոր փաստաթղթերը և դուք կտեսնեք, որ բոլորի մեջ ասված է՝ ԼՂ ներկայացուցիչները պետք է մասնակցեն բուն խաղաղության պայմանագրի մշակմանն ու բանակցություններին։ Սա, ի դեպ, եռանախագահող երկրների համաձայնությամբ է որոշվել։ Անհնար է որևէ համաձայնության գալ և որոշում կայացնել առանց արցախյան կողմի»,- ասաց Նալբանդյանը։
