Խնդրել եմ վարչապետին, որ մեզ մոտ ստուգումներ իրականացնեն: Այս պահին Պետական վերահսկողական ծառայությունը կառույցում ուսումնասիրություն է կատարում: Այս մասին լրագրողներին հայտնեց Արտակարգ իրավիճակների նախարար Ֆելիքս Ցոլակյանը: «Աշխատանքից ազատել են մարդկանց կամ մարդու, որը բողոքել է, թե իբր նախարարությունում տարբեր ուղղություններով խախտումներ կան: Դրա հիմքով խնդրել եմ, որ գան ստուգեն և պարզեն, իսկ եթե կան խախտումներ՝ պատժեն»,- ասաց Ցոլակյանը: Նա նաև նշեց, որ այդ խոսակցությունները սկսվել են Փրկարար ծառայության տնօրենին պաշտոնից ազատելուց հետո: «Փրկարար ծառայության ազատված ղեկավարը թերացել է, անտառային հրդեհների ժամանակ անտարբեր է եղել, Հայաստանում չի եղել»,- հավելեց նա: Նախարարի խոսքով, 6500 հոգուց բաղկացած կոլեկտիվում 9 հոգի է ընդամենը ստորագրել այն փաստաթղթի տակ, թե համակարգում խախտումներ կան:
