Ռուսաստանի և Իրանի արտգործնախարարներ Սերգեյ Լավրովը և Հոսեյն Ամիր Աբդոլլահյանը Վիեննայում ընթացող բանակցությունների համատեքստում քննարկել են Իրանի միջուկային ծրագրի շուրջ Համատեղ համապարփակ գործողությունների ծրագրի լիարժեք իրականացման վերականգնման հարցը։ Ըստ ՌԴ ԱԳՆ-ի՝ զրույցի ընթացքում ընդգծվել է, որ ՀԳՀԾ-ի վերակենդանացումը պետք է ապահովի, որ դրա բոլոր մասնակիցները ունենան հավասար իրավունքներ բոլոր ոլորտներում համագործակցության անխոչընդոտ զարգացման հարցում՝ առանց որևէ խտրականության։ Տեղի է ունեցել մտքերի փոխանակություն տարածաշրջանային և միջազգային օրակարգի մի շարք արդի հարցերի, այդ թվում՝ սիրիական կարգավորման և Ուկրաինայում տիրող իրավիճակի շուրջ։
