Ադրբեջանցի ընդդիմադիր լրագրող Աֆղան Մուխթարլին, ով քաղաքական դրդապատճառներով դատապարտվել էր 6 տարվա ազատազրկման, չի հավատում Ադրբեջանի արդարադատությանը և իր վաղաժամկետ ազատ արձակմանը: Այս մասին հայտնում է ադրբեջանական «Թուրան» լրատվական գործակալությունը:«Դատերն ընթանում են անօրինականություններով, այդ պատճառով ես չեմ հավատում դատական գործընթացների արդյունքում իմ ազատ արձակմանը»,- գործակալության հետ զրույցում հայտնել է ընդդիմադիր լրագրողը:Աֆղան Մուխթարլին նշել է նաև, որ տեղյակ է միջազգային իրավապաշտպան կազմակերպությունների կողմից իր գործի շուրջ տարվող լուրջ աշխատանքի մասին:«Ամեն ինչ կախված է երկրի նախագահի որոշումից: Հնարավոր չէ կանխատեսել, թե ինչ որոշում կկայացնի նա»,- նշել է Մուխթարլին:Աֆղան Մուխթարլին փետրվարի 8-ին երկու օրով բանտից ազատ է արձակվել հարազատների քառասունքին մասնակցելու համար: 2017 թ. դեկտեմբերի 31-ին Զաքաթալայի շրջանում գտվող տանը մահացած էին գտել Աֆղան Մուխթարլիի քրոջը և երկու զարմիկներին: Ադրբեջանական ոստիկանության հայտնած պաշտոնական վարկածի համաձայն` նրանց մահվան պատճառը եղել էր գազի արտահոսքը:
