Հայաստանում արտադրվող ռուսական արտադրության «Սպուտնիկ լայթ» պատվաստանյութն առաջիկայում շրջանառության մեջ կդրվի և կկիրառվի որպես երրորդ՝ խթանիչ դեղաչափ: Այդ մասին այսօր՝ դեկտեմբերի 6-ին, «Լիկվոր» դեղագործական ընկերությունում շրջայցից հետո հայտնել են ՀՀ առողջապահության էկոնոմիկայի նախարարները:
Առողջապահության նախարար Անահիտ Ավանեսյանը սա համարում է ՀՀ-ում դեղագործական արտադրության համար «շատ մեծ քայլ առաջ»:
Պատվաստանյութը հասանելի է լինելու քաղաքացիներին անվճար, ինչպես մյուս բոլոր պատվատսանյութերը: Առողջապահության նախարարը հավաստիացնում է, որ առաջիկայում կիրականացվի գնման գործընթացը և պատվաստանյութը կլինի նախարարության տեսականու մեջ: «Մեր քաղաքացիները հենց երրորդ՝ խթանիչ դեղաչափի համար կարող են դիմել և ստանալ «Սպուտնիկ Լայթ» տարբերակը»,- հավաստիացրեց նախարարը՝ նշելով, որ «Սպուտնիկ Լայթը»-ը որպես խթանիչ դեղաչափ կարող են ստանալ ոչ միայն Sputnik V-ի երկու դեղաչափ ստացած քաղաքացիները, այլ նաև այլ պատվաստանյութերով պատվաստվածները:
Էկոնոմիկայի նախարար Վահան Քերոբյանը ևս հավաստիացրեց, որ Առողջապահության նախարարության, «Լիկվոր» ընկերության և ռուս գործընկերների հետ տևական աշխատանքից հետո այսօր արդեն Հայաստանում արտադրվում է բոլոր հսկողական չափանիշներն անցած պատրաստի արտադրանք: «Այն պատրաստ է մտնել շուկա», - նշեց նա:
Ասուլիսի ժամանակ շշետվեց, որ Հայաստանում կատարվում է ոչ թե ուղղակի շշալցում, այլ ռուսական կողմի տեխնոլոգիական տրանսֆերի հիման վրա վերարտադրվում է պատվաստանյութը: «Ըստ մեր պայմանագրի ռուսական կողմը կատարել է տեխնոլոգիական տրանսֆեր, և մեր ընկերությունը վերարտադրել է այս պատվաստանյութը, ներդրումներն արվել են մեր ընկերության կողմից: Սա կարևոր հաջողություն էր թե մեր ընկերության, թե մեր երկրի համար»,-ասաց «Լիկվոր» ՓԲԸ-ի գլխավոր տնօրեն Սերգեյ Մաթևոսյանը:
Արտադրության շղթան հետևյալն է. Ռուսաստանից ստացված մայր հումքը վերամշակվում է՝ անցնելով առաջնային փաթեթավորում, երկրորդային փաթեթավորում և սառնային ռեժիմի տակ պահպանում:
Հայաստանում «Սպուտնիկ լայթ» պատվաստանյութի արտադրության գործընթացը սկսսելիս, ինչպես նշեց նախարար Քերոբյանը, նկատի են ունեցել արտահանման հնարավորությունները: «Արտահանումը կբազմապատկի արտադրանքի ծավալները: Այժմ արտահանման հստակ պայմանագրեր չկան, սակայն Մերձավոր Արևելյան մի շարք երկրների հետ բանակցություններ գնում են, քննարկվում է նաև որոշ աֆրիկյան երկրներ արտահանելու տարբերակը», - ասաց նա՝ վստահություն հայտնելով, որ ռուս գործընկերների հետ սերտ համագործակցության շնորհիվ դա հնարավոր կդառնա:
