Ռազմագերիների վերադարձը չի կարող շաղկապվել այլ գործընթացների հետ. Սոս Ավետիսյան

Ռազմագերիների վերադարձը բացառապես հումանիտար հարց է, այն չի կարող կապվել այլ գործընթացների հետ։ Այս մասին այսօր՝ հունիսի 30-ին, ԱԺ-ում տեղի ունեցած մամուլի ասուլիսի ժամանակ հայտարարեց ԵԽԽՎ-ում հայկական խորհրդարանական պատվիրակության անդամ, «Իմ քայլը» իշխող դաշինքի անդամ Սոս Ավետիսյանը։

Նրա խոսքով՝ հենց այդ սկզբունքի վրա է հիմնվում հայկական դիվանագիտությունը, այդ թվում՝ խորհրդարանական։ «Մեր եվրոպացի գործընկերները հստակ հայտարարում են, որ անընդունելի է ռազմագերիների վերադարձի հարցը բանակցությունների առեւտրի առարկա դարձնելը», - հայտարարել է Ավետիսյանը: Նա հիշեցրել է, որ այս հարցի քննարկման շրջանակներում ընթացիկ տարվա ապրիլին բոլոր ելույթ ունեցողները նշել են բոլոր ռազմագերիներին առանց որեւէ նախապայմանի վերադարձնելու անհրաժեշտությունը:

Ավետիսյանը նաև ընդգծել է, որ այդ հարցն առանձին կետ է ներառվել Արցախի վերաբերյալ եռակողմ հայտարարության մեջ, որը ստորագրվել է նոյեմբերի 9-ին:

Հիշեցնենք, որ այսօր ԵԽԽՎ-ում պատվիրակության անդամ, ԲՀԿ խմբակցության անդամ Նաիրա Զոհրաբյանը նշել էր, որ ԵԽԽՎ նստաշրջանի շրջանակներում զրուցել է այդ կառույցում ադրբեջանցի պատվիրակության ղեկավարի հետ, ով հայտարարել է, որ «հայ ռազմագերիների վերադարձի հարցի քննարկումը հնարավոր է միայն այն դեպքում, եթե Հայաստանը ճանաչի Ադրբեջանի տարածքային ամբողջականությունը»: