«Ընտրությունների մասնակցող 13 կուսակցություններ զրկվել են երկրի այս վիճակի համար պատասխանատու անձանցից որևէ մեկի հետ բանավիճելու հնարավորությունից։ Հեռուստաբանավեճի կազմակերպիչները որդեգրել են անարդարացի սկզբունք»։ Նախընտրական հեռուստաբանավեճի ձևաչափի վերաբերյալ նման հայտարարությամբ են հանդես եկել հունիսի 20-ին կայանալիք արտահերթ խորհրդարանական ընտրությունների մասնակից 10 կուսակցություններ։
«Քաղաքացու որոշում» կուսակցության նախաձեռնությամբ ծավալված քննարկումների արդյունքում ընտրություններին մասնակցող 10 քաղաքական ուժեր համաձայնության են եկել հետևյալ հայտարարության բովանդակության շուրջ․
«Հանրային Հեռուստատեսության և Ազգային Ժողովրդական Ինստիտուտի (NDI) նախաձեռնած նախընտրական ցուցակների առաջին համարների բանավեճի՝ մասնակիցների ընտրությունը անարդար է կատարվել։
Բանավեճը անց է կացվելու երկու խմբով՝ յուրաքանչյուրում 13 մասնակից։ Խմբերն ընտրվել են հետևյալ սկզբունքով՝ առաջին խմբում մասնակցելու են առավել վաղ պետական գրանցում ստացած կուսակցությունները, իսկ երկրորդ խմբում՝ առավել ուշ գրանցված կուսակցությունները։ Ընդ որում, հասկանալով, որ այս սկզբունքով մեկ ամիս առաջ գրանցված դաշինքները կհայտնվեին երկրորդ խմբում՝ ավելացրել են երկրորդ սկզբունքը, ըստ որի հաշվի է առվում ոչ թե դաշինքի, այլ դրա կազմում ընդգրկված կուսակցություններից առավել հնի գրանցման ամսաթիվը։
Այսպիսով ընտրությունների մասնակցող 13 կուսակցություններ զրկվել են երկրի այս վիճակի համար պատասխանատու անձանցից որևէ մեկի հետ բանավիճելու հնարավորությունից։ Կազմակերպիչները լավ իմանալով, որ բանավեճը ազդեցություն ունի ընտրությունների արդյունքների վրա՝ որդեգրել են անարդարացի սկզբունք։ Այն բացառում է նոր կուսակցությունների, նոր ասելիքի առերեսումը և համեմատումը հին կուսակցությունների և հին ասելիքի հետ՝ փորձելով քաղաքացիներին ցույց տալ, որ իրական հակադրությունը հին կուսակցությունների միջև է, իսկ նորերն ընդամենը զանգվածային տեսարան են ապահովում «գլխավոր» դերակատարների համար։
Բանավեճի այս ձևաչափը խախտում է անաչառության, մրցակցային հավասար պայմանների ապահովման սկզբունքները։
Անհրաժեշտ է, որպեսզի վերանայվեն մասնակիցների ընտրության սկզբունքները և նախընտրական բանավեճը կազմակերպվի նոր՝ արդարացի սկզբունքով։ Հակառակ պարագայում՝ մենք հրաժարվելու ենք մասնակցել այդ բանավեճին։
Ազատական կուսակցություն
Ազգային Օրակարգ կուսակցություն
Արդար Հայաստան կուսակցություն
Ինքնիշխան Հայաստան կուսակցություն
«Համահայկական ազգային պետականություն» (ՀԱՊ) կուսակցություն
Մեր տունը Հայաստանն է կուսակցություն
Միասնական հայրենիք կուսակցություն
Շիրինյան-Բաբաջանյան ժողովրդավարների դաշինք
Քաղաքացու որոշում ՍԴԿ
Հայտարարության բովանդակությանը իր համաձայնությունն է տվել ևս մեկ կուսակցություն, որը, սակայն, ցանկացել է հանդես գալ առանձին հայտարարությամբ»,- ասված է հայտարարությունում։
Արտահերթ խորհրդարանական ընտրությունների մասնակից 26 քաղաքական ուժերի հեռուստաբանավեճը տեղի կունենա երկու խմբով՝ 13: 13. կանցկացվի 4 դեբատ: Հունիսի 8-ին, 11-ին կլինի քաղաքական ուժերի ներկայացուցիչների հեռուստաբանավեճը, իսկ հունիսի 16-ին ու 17-ին՝ առաջնորդների:
Առաջնորդների դեբատի դեպքում քաղաքական ուժերը կբաժանվեն խմբերի՝ ըստ արդարադատության նախարարությունում գրանցման ամսաթվի: Առաջին խմբում կլինեն ավելի վաղ գրանցված 13 կուսակցությունները: Ներկայացուցիչների հեռուստաբանեճի դեպքում խմբերի բաժանումը կկայանա Կենտրոնական ընտրական հանձնաժողովի վիճակահանությամբ հաստատված ցանկի համաձայն. առաջին խմբում կլինեն քվեաթերթիկի 1-ից 13 համարները, երկրորդ խմբում՝ 14-26-ը:
