Հայաստանը խորացնում է համագործակցությունը Իրանի հետ

Հայաստանն ու Իրանը ունեն  առարկայական համագործակցության բազմաթիվ ծրագրեր, որոնց մի մասն իրականացվում է, մյուս մասը գտնվում է քննարկման փուլում: Այս մասին ԱԺ-ում հայտարարեց ՀՀ փոխվարչապետի պաշտոնակատար Տիգրան Ավինյանը:

Խոսելով Իրանի հետ համագործակցության մասին, Ավինյանն առաջին հերթին նշեց «Պարսից ծոց - Սև ծով» նախագիծը: Ավինյանը բացատրեց, որ սա հաղորդակցական նախագիծ է, որն ապահովելու է Պարսից ծոցի կապը Սև ծովի հետ և ենթադրելու է այս երթուղով բեռների փոխադրման հեշտ գործընթաց:

Երկրորդ խոշոր ծրագիրը, որին անդրադարձավ Ավինյանը, իրականացվում է էներգետիկայի ոլորտում: Նա նշեց, որ ներկայում Իրանի հետ իրականացվում է բարձրավոլտ երրորդ էլեկտրահաղորդման գծի կառուցման ծրագիր:

«Իրանական կողմի հետ գործում է էլեկտրաէներգիա  գազի դիմաց  բարթերային համաձայնագիր: Այս պահին քննարկվում է այս փաստաթղթի գործողության ժամկետը երկարացնելու հարցը», - ասաց նա:

Ավինյանը նաև տեղեկացրեց, որ թվարկված համատեղ ծրագրերից բացի, երկրների միջև առկա է նաև ապրանքաշրջանառության աճ: