Մայիսի 9-ին Հայաստանում լայնորեն նշվում է Հաղթանակի օրը:
Հայ ժողովուրդը նախկին ԽՍՀՄ այլ ժողովուրդների հետ միասին հերոսաբար մասնակցեց Հայրենական մեծ պատերազմին (1941-1945): Մոտ կես միլիոն հայեր կռվել են այս պատերազմում, շուրջ 300 հազարն այդպես էլ տուն չվերադարձավ: Զոհվածների և անհետ կորածների թվով հայ ժողովրդի կորուստները համեմատելի են Միացյալ Նահանգների, Մեծ Բրիտանիայի և Ֆրանսիայի կորուստների հետ:
Այդ սարսափելի պատերազմում հաղթանակը հնարավոր դարձավ խորհրդաին ժողովրդի բացառիկ հերոսության, համբերատարության և դիմացկունության, ու, հատկապես, մեծ ու փոքր ժողովուրդների բարեկամության և եղբայրության, ինչպես նաև անասելի հայրենասիրության շնորհիվ, որը երբեք չի դադարում զարմացնել:
Այսօր, Մեծ հաղթանակից 76 տարի անց, Հայաստանում ապրում է 148 վետերան (վերջին տարին խլեց ավելի քան 50 վետերանի կյանք): VERELQ-ի հետ զրույցում Հայ վետերանների ասոցիացիայի նախագահ, գնդապետ Սիմոն Եսայանը նշեց, որ նրանցից ամենատարեցը հենց Հաղթանակի օրը դառնում է 100 տարեկան: Այս տարի կառավարությունը ոչ մի կերպ չի հիշել վետերանների մասին. միջոցառումներ, շնորհավորանքներ դեռ չկան: Բայց այնպես չէ, որ վետերանները մոռացված են. խոսելով հայաստանյան հասարակական կազմակերպությունների հետ ասոցիացիայի կապերի մասին, Սիմոն Եսայանը հատկապես նշեց բարեկամությունն ու համագործակցությունը Եվրասիական փորձագիտական ակումբի հետ:
""Ինտեգրացիա և զարգացում" ՀԿ-ն և Եվրասիական փորձագիտական ակումբը վերջին երեք տարիների ընթացքում սերտ համագործակցում են վետերանների ասոցիացիայի հետ: Ակումբի համակարգող Արամ Սաֆարյանը վետերանների հաճախակի հյուրն է: Նրա կարծիքով, վետերանների հետ աշխատանքը շատ կարևոր և պահանջված է ժամանակակից հայ հասարակության մեջ: Եվ սա մեզ անկեղծ ուրախացնում է", - ընդգծեց պաշտոնաթող գնդապետը:
Մայիսի 9-ին Եվրասիական փորձագիտական ակումբի անունից պատերազմի տասը ամենահայտնի վետերաններին կտրամադրվեն արժեքավոր նվերներ. վերջին տարիներին դա արդեն ավանդույթ է դարձել: Ակումբի համակարգող, քաղաքական վերլուծաբան Արամ Սաֆարյանի խոսքով, վետերանների մասնակցությունն ակումբի համաժողովներին և կլոր սեղաններին, Հայաստանի առաջատար բուհերի լավագույն ուսանողների և ասպիրանտների մասնակցությամբ, կարևոր ներդրում է մեր երիտասարդության կրթվելու հարցում: Մեր զրուցակիցը հատկապես նշեց, որ պատերազմի վետերանները հայ-ռուսական ռազմական եղբայրության ավանդույթների ամենաթանկ կրողներն են: Նրանք նաև հավատարիմ են ժողովուրդների միջև բարեկամության ավանդույթներին և հիանալի հասկանում են հայ-ռուսական ռազմավարական դաշինքի դերը Հայաստանում անվտանգության ամրապնդման և կայունության ապահովման գործում:
«Մեր ակումբի անդամները հաճախ քննարկում են Հայաստանի պաշտպանության նախարար Վաղարշակ Հարությունյանի հետ, ով նաև ակումբի վաղեմի անդամ է, վետերանների ներուժը հրամանատարական անձնակազմի և կուրսանտների հայրենասիրական դաստիարակության գործում օգտագործելու հարցերը: Գաղտնիք չէ, որ ամենաակտիվ վետերանները սերտ կապեր են պահպանում Հայաստանի և Ռուսաստանի Զինված ուժերի ներկայացուցիչների հետ: Օրինակ, ռուս զինվորներն ու սպաները լեգենդար Ռոզալիա Աբգարյանի հաճախակի հյուրերն են: Ի դեպ, այս գործունեության հետագա ակտիվացման ծրագրերն արդեն քննարկվել են Հայաստանի պաշտպանության նախարարության հետ», - ասաց Սաֆարյանը:
Ցավոք, շարունակեց նա, կորոնավիրուսի համաճարակն իր բացասական ազդեցությունն ունեցավ այս աշխատանքի վրա՝ ժամանակավորապես դադարեցնելով վետերանների մասնակցությունը Եվրասիական փորձագիտական ակումբի մասսայական միջոցառումներին: Բայց Սաֆարյանը վստահ է, որ համաճարակաբանական իրավիճակի բարելավման հետ մեկտեղ վետերանների հետ աշխատանքը կրկին կակտիվանա, և այս գործողություններում անպայման ներգրավված կլինեն մեր երիտասարդության լավագույն ներկայացուցիչները:
Սիմոն Եսայանը ևս բարձր գնահատեց Եվրասիական փորձագիտական ակումբի ակտիվիստների հետ արդյունավետ համագործակցությունը. «Այդ զեկույցներն ու հրապարակային դասախոսությունները շատ կարևոր են: Մեզ համար սա և՛ ճշտված տեղեկատվություն է, և՛ քաղաքացիական դիրքորոշման արտահայտում, որի հետ մենք լիովին համերաշխ ենք: Իսկ մեր հանդեպ ուշադրության համար, հատկապես Հաղթանակի օրը, հատուկ շնորհակալություն»:
Գնդապետ Եսայանն ասաց, որ «Գազպրոմ Արմենիան» դրամական նվերներ է հատկացրել 148 հայ վետերաններին (37 հազարական դրամ). «Մենք պատրաստ ենք ծառայել հայ ժողովրդին և մեր գիտելիքները փոխանցել սերունդներին... եթե դա հետագայում ևս պահանջարկ ունենա», - հավելեց նա:
Մայիսի 9-ին Պաշտպանության նախարարության ղեկավարությունը, հասարակությունը շնորհավորելու են ալեհեր վետերաններին իրենց գլխավոր տոնի առթիվ: Մնում է հուսալ, որ Մեծ Հաղթանակի դասերը, դրա հիշատակը սրբորեն կհարգեն ոչ միայն ավագ և միջին սերունդների ներկայացուցիչները, այլև երիտասարդները, և սերունդների միջև անջրպետ այս կարևոր հարցում չի լինի:
