Պետք է ամեն ինչ անել, որ համաժողովրդական շարժում լինի Նիկոլ Փաշինյանին հեռացնելու համար: Այդ մասին այսօր հայտարարել է ընդդիմության վարչապետի թեկնածու Վազգեն Մանուկյանը լրագրողների հետ ճեպազրույցում:
Նա անդրադարձավ հարցին, որ իշխանությունները հրաժարվում են արտահերթ ընտրություններ անցկացնելուց՝ ասելով այդ ընտրությունները «մենք չէինք նշանակել»։
«Մենք կողմնակից ենք եղել, բայց ի՞նչ ընտրություններ՝ Նիկոլ Փաշինյանի հեռացումից հետո։ Ինքն ուզեցավ նախաձեռնություն ցուցաբերել, հայտարարեց։ Մենք առաձնապես բանատեղ չդրեցինք դա, խորամանկություն էր անելու, թե ոչ, դրանից մեր նախագծերը չփոխվեցին։ Մեր նախագիծը մնաց նույնը՝ համաժողովրդական շարժումով իրեն փոխել»,- ասաց նա։
Հարցին՝ պատրաստ է արդյոք Ռոբերտ Քոչարյանի հետ մի դաշինքում մասնակցել հայտարարել է, թե մասնակցելու է ընտրություններին, Մանուկյանը պատասխանեց. «Նախ և առաջ ընտրություններ չեն լինելու։ Նիկոլ Փաշինյանը, եթե փոխվի, ժամանակավոր իշխանություն պիտի լինի։ Եվ նախատեսված է, որ ես կլինեմ վարչապետ։ Ես հայտարարել եմ, որ դրանից հետո ես ընտրություններին չեմ մասնակցելու։ Իսկ եթե Նիկոլ Փաշինյանը հայտարարեր ընտրություններ և իրեն հաջողվեր անցկացնել, որը ես անհնարին եմ համարում, ես նորից հայտարարել եմ, որ նույնիսկ այդ դեպքում ընտրություններին չեմ մասնակցելու»։
Նրա համաձայնեց, որ սահմանադրական ճանապարհով Նիկոլ Փաշինյանին հեռացնելու հնարավորություն այս փուլում չկա՝ նշելով, որ պետք է ամեն ինչ անել, որ համաժողովրդական շարժում լինի։
«Մի քանի հարյուր հազար մարդիկ կան, ովքեր սարսափելի էմոցիոնալ դժգոհության մեջ են, միլիոն մարդ էլ կա, որը դժգոհ է Նիկոլ Փաշինյանից, բայց հավես չունի մասնակցելու այս ամեն ինչին։ Պետք է կարողանանք էդ մարդկանց փողոց հանել, որ լինի համաժողովրդական շարժում՝ իր ամբողջ տպավորիչ ծավալով։ Նիկոլ Փաշինյանն ինքը կամավոր չի հրաժարվի մի քանի պատճառով։ Նախ ինքը վախենում է, թե ինչ պատասխան է տալու իշխանությունը կորցնելուց հետո»,- ասաց նա։
«Երկրորդ, չտես մարդիկ մեկ էլ եկել են իշխանության ու վայելում են։ Իրենք հեշտ չեն տա իշխանությունը։ Այդ դեպքում պետք է կոտրել իր հենարանները։ Իսկ ովքե՞ր ենք իր հենարանները, դա ԱԺ Իմ քայլն է։ Այսինքն՝ պետք է աշխատել Իմ քայլի հետ»։ Ըստ նրա՝ հենարանի մի մասը ոստիկանության բարձրաստիճան սպաներն են, որոնք դաժան էին վարվում ժողովրդի հետ։ «Երկու-երեք հենարան են, էդ հենարանները, որ փլվեն, ինքն էլ կփլվի»,- հավելեց նա։
