Եթե միտումը պահպանվի՝ կշարունակենք տնտեսական գործունեության տարբեր տեսակներ բացել. Ավինյան

Երեկ երեկոյան տնտեսական գործունեության տեսակների վերաբերյալ որոշումը թարմացվել է, և մի շարք ոլորտներում տնտեսական գործունեության տեսակներ թույլատրվել են: Այս մասին կառավարության այսօրվա նիստում հայտարարել է ՀՀ փոխվարչապետ, արտակարգ դրության պարետ Տիգրան Ավինյանը:

Նա թվարկել է, թե ո՞ր հատվածների համար են հանվել սահմանափակումները և նշել. 

«Ինչպես և խոստացել էինք, փուլային տարբերակով մենք կամաց-կամաց գնում ենք դեպի բացում, և միաժամանակ մեր տեղորոշման համակարգերն ավելի ու ավելի էֆեկտիվ են աշխատում այս փուլում։ Ամբողջապես այս համակարգը տեղափոխվել է ԱԻՆ-ի կառավարման կենտրոն, և այնտեղից և՛ համաճարակաբանները, և՛ Արտակարգ իրավիճակների նախարարության աշխատակիցները, և՛ ծրագրավորողները միասին աշխատում են մեր համակարգմամբ, և այս համակարգը փոխլրացնում է Համաճարակների վերահսկման և կանխարգելման ազգային կենտրոնի աշխատանքը: Այս փուլում կարելի է ասել, որ դեռևս վիրուսի տարածման տենդենցը վերահսկելի է, և եթե նման ձևով շարունակվի, կարծում եմ, մենք կրկին կշարունակենք տնտեսական գործունեության տարբեր տեսակներ բացել»,- նշեց Ավինյանը:

VERELQ-ը ներկայացնում է այն սահմանափակումների ցանկը, որոնք վերացվել են Պարետի որոշմամբ: