ՀՀ երկրորդ նախագահ Սերժ Սարգսյանը վստահ է՝ ճիշտ որոշում է կայացրել մասնակցելու 2016 թվականի ապրիլյան պատերազմի հանգամանքներն ուսումնասիրող քննիչ հանձնաժողովի նիստին:
«Իմ որոշումը գալ հանձնաժողովի նիստին ամբողջովին արդարացված էր», - ասաց երկրորդ նախագահը քննիչ հանձնաժողովի նիստից հետո, որը տևեց 4,5 ժամ: Նիստի ժամանակ Սերժ Սարգսյանը նախ հանդես է եկել ապրիլյան պատերազմի մասին սեփական վերլուծությամբ, այնուհետև պատասխանել քննիչ հանձնաժողովի անդամների հարցերին:
«Նիստն ընթացել է նորմալ պայմաններում, փոխադարձ հարգանքի մթնոլորտում։ Ուրախ եմ, որ կարողացել եմ լրացուցիչ տեղեկություններ հայտնել ապրիլյան ռազմական գործողությունների վերաբերյալ», - ասաց Սարգսյանը՝ նշելով, որ հնարավորություն չունի լրագրողների բոլոր հարցերին պատասխանելու:
«Ուղղակի դրանք այնքան կարևոր իրադարձություններ էին, որ որտքի վրա անհար է հասնել այն նպատակին, ինչը ես եմ հետապնդում: Իսկ իմ նպատակը շատ պարզ է՝ հասցնել մեր հանրությանը իրական հավաստի տեղեկություններ ռազմական գործողությունների մասին»,- ասաց Սարգսյանը։
Երկրորդ նախագահը հերքեց ապրիլյան պատերազմի շուրջ շրջանառվող դավադրությունները՝ նշելով, որ Հայաստանի որևէ դաշնակից, թե բարեկամ պետություն դրանում ներքաշված չի եղել:
Նա չպատասխանեց լրագրողների հարցին առ այն, թե ինչու տարիներ առաջ հայտարարել էր ապրիլյան պատերազմի հետևանքով 800 հեկտար տարածքի կորստի մասին, սակայն վերջերս 5-րդ ալիք հեռուստաընկերության նկարահանած վավերագրական ֆիլմում խոսել դրա ուղիղ կեսի՝ 400 հեկտար մակերեսով տարածքի կորստի մասին:
Նիստից հետո քննիչ հանձնաժողովի նախագահ Անդրանիկ Քոչարյանը լրագրողներին հայտնեց, որ 2016 թ. հանձնաժողովի նիստին երրորդ նախագահի մասնակցությունից հետո պետք է մասնակցեն նաև այն պաշտոնյաները, ովքեր մինչ այս հրաժարվել են:
Նա մասնավորապես նկատեց, որ խոսքը վերաբերում է Յուրի Խաչատուրովին, որն ապրիլյան պատերազմի ժամանակ զբաղեցրել է Զինված ուժերի գլխավոր շտաբի պետի պաշտոնը։
«Սերժ Սարգսյանի հետ քննարկման մեջ ասացինք, որ Յուրի Խաչատուրովի չգալը սխալ էր, նա էլ ընդունեց: Նաև ասաց, որ ինքը այստեղ գալուց առաջ խոսել է Յուրի Խաչատուրովի հետ և ասել է՝ ճիշտ կլիներ, որ գար։ Կարծում եմ՝ Սերժ Սարգսյանի՝ մեզ մոտ լինելուց հետո ճիշտ կլինի, որ Յուրի Խաչատուրովն էլ գա և պատասխանի իրեն վերաբերող հարցրին»,- ասաց նա։
Քոչարյանն ասաց, որ Սերժ Սարգսյանին հարցեր են ուղղել ապրիլյան պատերազմի օրերին ու դրանից առաջ հետախուզության ու հակահետախուզության աշխատանքների մասին: «Խնդիրներ այստեղ եղել են», - ասաց Քոչարյանը:
