Վրաստանում Զարեհ Սինանյանը քննարկել է հայերի լիարժեք ինտեգրումը և ինքնության պահպանումը

Վրաստան կատարած այցի շրջանակներում Զարեհ Սինանյանն այսօր հանդիպել է Վրաստանի Հաշտության և քաղաքացիական հավասարության հարցերով պետնախարար Քեթևան Ցիխելաշվիլու հետ: Այս մասին տեղեկանում ենք Վրաստանում ՀՀ դեսպանատան Facebook-յան էջից:

Պետնախարարը հանձնակտարին ներկայացրել է քաղաքացիական ինտեգրման ուղղությամբ Վրաստանի կառավարության ռազմավարությունն ու առաջնահերթությունները: Քեթևան Ցիխելաշվիլին նշել է, որ Վրաստանի կառավարության համար կարևոր է ինչպես այլ ազգությունների լիարժեք ինտեգրումը, այնպես էլ ազգային ինքնության պահպանման խրախուսումը:

Այս համատեքստում հատկապես կարևորվել է էթնիկ լեզվի ուսուցման շարունակականության ապահովումը, ինչպես նաև պետական լեզվի իմացության մակարդակի բարելավումը:

Գլխավոր հանձնակատար Զարեհ Սինանյանը նշել է, որ Վրաստանի հայ համայնքը յուրահատուկ է և մյուս համայնքներից առանձնանում է իր պատմական հետագծով:

Հանձնակատարն ընդգծել է, որ մեզ համար կարևոր է հայերի լիակատար ներգրավվածությունը բնակության երկրների հասարակություններին և հանրային կյանքի տարբեր բնագավառներին՝ միևնույն ժամանակ պահպանելով հայ ինքնությունն ու մշակույթը:

Հանդիպման ընթացքում քննարկվել են երկուստեք հետաքրքրություն ներկայացնող այլ հարցեր ևս:

Այսօր Զարեհ Սինանյանը հանդիպել է նաև Վրաստանի արտաքին գործերի նախարարի տեղակալ Լաշա Դարսալիայի հետ:

Հանդիպմանը երկուստեք կարևորվել է հայ-վրացական բարեկամական հարաբերությունները, զարգացման հեռանկարները:

Զարեհ Սինանյանը նշել է, որ Վրաստանի հայ համայնքի հետ աշխատանքում իր գրասենյակը կարևորում է ինքնության պահպանումն ու երկրի հասարակական կյանքի տարբեր ոլորտներին հայ բնակչության լիարժեք ինտեգրումը, հանրային ակտիվության մակարդակի բարձրացումը: