Էդմոն Մարուքյանը ԵԽԽՎ-ում կոչ է արել Թուրքիայի զորքերը դուրս բերել Սիրիայի տարածքից

ՀՀ ԱԺ ԵԼՔ խմբակցության պատգամավոր Էդմոն Մարուքյանը ԵԽԽՎ-ում կոչ է արել Թուրքիային դադարեցնել ռազմական գործողությունները, զերծ մնալ բախումներից ու հարձակումներից, եւ զորքերը դուրս բերել Սիրիայի տարածքից։

Ինչպես հայտնում են Լուսավոր Հայաստան կուսակցության մամուլի ծառայությունից, հունվարի 24-ին Եվրոպայի խորհրդի խորհրդարանական վեհաժողովի (ԵԽԽՎ) ձմեռային նստաշրջանի նիստում հրատապ քննարկվող «Թուրքիայի ռազմական ներխուժումը Սիրիա» թեմայով Լուսավոր Հայաստան կուսակցության Խորհրդի նախագահ, ՀՀ ԱԺ ԵԼՔ խմբակցության պատգամավոր Էդմոն Մարուքյանը Եվրոպայի Դեմոկրատների եւ Լիբերալների քաղաքական խմբի անունից ելույթ է ունեցել, որում մանրամասն ներկայացրել է Թուրքիայի կողմից խաղաղ բնակչության շրջանում իրականացվող ռազմական գործողությունները, քաղաքացիական բնակչության ռմբակոծման փաստերն ու Թուրքիային կոչ արել դադարեցնել ռազմական գործողությունները, զերծ մնալ բախումներից ու հարձակումներից եւ զորքերը դուրս բերել Սիրիայի տարածքից։

Էդմոն Մարուքյանը Եվրոպայի Դեմոկրատների եւ Լիբերալների քաղաքական խմբի անունից հայտարարել է, որ միանում են Ֆրանսիայի, ԱՄՆ-ի այն կոչին, որով առաջարկվել է ՄԱԿ-ի Անվտանգության խորհրդին հրատապ նիստ հրավիրել։ Միաժամանակ Մարուքյանը կոչ է արել նաեւ միջազգային հանրությանը միջոցներ ձեռնարկել հերթական հումանիտար աղետը կանխելու եւ Սիրիայում քաղաքացիական բնակչությանը պաշտպանության համար։