Ճանապարհներ դեպի նոր դպրոցներ. պետությունը միջոցներ կհատկացնի

Հայաստանի կառավարությունը շարունակում է կրթական ենթակառուցվածքների արդիականացումը։ Գործադիրը որոշում է կայացրել զգալի ֆինանսական միջոցներ ուղղել դեպի կլաստերային դպրոցներ տանող ճանապարհների հիմնանորոգմանը՝ ապահովելով աշակերտների անվտանգ և հարմարավետ տեղաշարժը դեպի նոր ուսումնական հաստատություններ։

Մարտի 5-ի նիստում հաստատվել են 2026 թվականի պետական բյուջեի և նախկինում ընդունված որոշումների փոփոխությունները։ Նախատեսվում է մարզպետարաններին տրամադրել 339 միլիոն դրամ, որը կծառայի դեպի կլաստերային դպրոցներ տանող 7,4 կիլոմետր ընդհանուր երկարությամբ ճանապարհների հիմնանորոգման նախագծանախահաշվային փաստաթղթերի կազմմանն ու դրանց փորձաքննության ծառայություններին։ Գումարի մի մասն էլ կուղղվի 1,4 կիլոմետրանոց ճանապարհահատվածի բուն հիմնանորոգման աշխատանքներին։

Տարածքային կառավարման և ենթակառուցվածքների նախարար Դավիթ Խուդաթյանի խոսքով՝ կառավարությունն այսօր չզեկուցվող հարցերի շրջանակում հաստատել է ևս մեկ կարևոր նախագիծ։ Հատկացվել է 503,5 միլիոն դրամ՝ 470 կիլոմետր ճանապարհների և 10 տրանսպորտային օբյեկտների կառուցման, վերակառուցման ու նորոգման նախագծային փաստաթղթերի և փորձաքննությունների ձեռքբերման նպատակով։ Նախարարն ընդգծել է, որ սա արդեն երկրորդ նմանատիպ համապարփակ որոշումն է։

Վարչապետ Նիկոլ Փաշինյանը պարզաբանել է, որ այս նախաձեռնություններն ուղիղ կապ ունեն 300 նոր դպրոցների կառուցման պետական ծրագրի հետ։ Կառավարության ղեկավարը շեշտել է նախկինում հնչեցրած այն սկզբունքը, որ երեխաները պետք է նորակառույց դպրոց հաճախեն բացառապես նոր ու բարեկարգ ճանապարհներով։ Բացի այդ, նա տեղեկացրել է, որ աշակերտների տրանսպորտային ապահովման հարցում ծնողների հետ շփումների արդյունքում ի հայտ են եկել նոր ուշագրավ գաղափարներ, որոնք գործադիրը նախատեսում է փորձարկել առաջիկայում։