Հայաստանը սահմանել է Սևանում սիգի որսի 2026թ. չափաքանակն ու նոր դրույքաչափերը

Հայաստանի կառավարությունը հինգշաբթի օրը հաստատել է 2026 թվականի համար Սևանա լճում սիգի արդյունագործական որսի 550 տոննա չափաքանակը՝ միաժամանակ եռապատկելով ձկնորսների համար սահմանված հարկային վճարը:

Շրջակա միջավայրի նախարարի տեղակալ Արա Մկրտչյանը փետրվարի 5-ին կայացած գործադիրի նիստում հայտնել է, որ որսաշրջանը կմեկնարկի փետրվարի 6-ին և կշարունակվի մինչև նոյեմբերի 20-ը:

Որսի թույլատրելի ծավալները սահմանվել են Գիտությունների ազգային ակադեմիայի իրականացրած հաշվառման հիման վրա, որի համաձայն լճում սիգի ընդհանուր պաշարը 2025 թվականի վերջին կազմել է շուրջ 3592 տոննա, իսկ արդյունագործական պաշարը՝ մոտ 1374 տոննա: Կառավարությունը նախատեսում է ամռանը հետազոտությունների երկրորդ փուլն անցկացնել, ինչի արդյունքներով հնարավոր է սահմանվի հավելյալ չափաքանակ աշնանային որսաշրջանի համար:

Ոլորտի կարգավորման ամենաէական փոփոխությունը բնօգտագործման վճարի բարձրացումն է. այսուհետ սիգի 1 կիլոգրամի համար տնտեսվարողները նախկին 65 դրամի փոխարեն կվճարեն 200 դրամ: Բացի այդ, վճարումները պետք է կատարվեն ոչ թե փաստացի որսված ծավալի, այլ ամբողջ տրամադրված չափաքանակի համար:

Փոխնախարարի ներկայացրած վիճակագրությունը փաստում է նախորդ տարիներին որսի ծավալների և բյուջե վճարվող գումարների հետևողական աճի մասին, ինչը գերատեսչությունը կապում է պաշարների վերականգնման և վարչարարության արդյունավետության բարձրացման հետ: