Հայաստանում հարբուխն ու վիրուսները նահանջում են․ դեպքերը նվազել են

Հանրապետությունում համաճարակային լարվածությունը թուլանում է․ վերջին տվյալներով՝ շնչառական վարակների ակտիվությունը նվազել է, թեև հիվանդացության հիմնական բեռը շարունակում է ընկնել անչափահասների վրա։

Հիվանդությունների վերահսկման և կանխարգելման ազգային կենտրոնի դիտարկումները ցույց են տալիս, որ տարվա 51-րդ շաբաթվա ընթացքում սուր շնչառական վարակներով պայմանավորված դեպքերը նախորդ շաբաթվա համեմատ կրճատվել են 1,2 անգամ։

Չնայած դրական դինամիկային՝ մասնագետները զգուշացնում են, որ երկրում դեռևս շարունակում են շրջանառվել գրիպի Ա տեսակի H3N2 ենթատեսակը, ինչպես նաև ռինովիրուսի, բոկավիրուսի և ադենովիրուսի հարուցիչները։

Վիճակագրությունը փաստում է, որ վարակները առավելապես տարածված են մանկահասակների և դպրոցականների շրջանում․ ընդհանուր դեպքերի 78 տոկոսը բաժին է ընկնում 0-18 տարեկաններին, իսկ ամենաբարձր ցուցանիշը գրանցվել է մինչև 14 տարեկանների մոտ։

Ընդհանուր պատկերին զուգահեռ՝ 1,2 անգամ նվազել են նաև հոսպիտալացումները, սակայն այստեղ ևս միտումը նույնն է՝ հիվանդանոցային բուժում ստացողների գերակշիռ մասը՝ 91 տոկոսը, երեխաներ են։