«Մեր ձևով»-ը մասնակցելու է 2026-ի ընտրություններին. Նարեկ Կարապետյան

Սամվել Կարապետյանի նախաձեռնությամբ հիմնադրված «Մեր ձևով» ժողովրդական շարժումն այսօր շնորհանդես-ասուլիս էր հրավիրել, որի շրջանակում հայտարարվեց, որ նպատակ ունեն համախմբել հասարակության տարբեր շերտերի ներկայացուցիչներին և առաջարկել նոր ձևաչափով համագործակցություն՝ ուղղված երկրի խնդիրների լուծմանը։ Ընդ որում՝ իրենք բաց են բոլորի համար, և պատրաստ են լսելու հասարակական պահանջներն ու առաջարկները։

«Տաշիր գրուպ» ընկերությունների խմբի փոխնախագահ, Սամվել Կարապետյանի եղբորորդի Նարեկ Կարապետյանը հայտարարեց, որ Հայաստանի հասարակական և քաղաքական կյանքում ստեղծվել է մի իրավիճակ, երբ ժողովրդի սպասելիքները չեն արդարացվում, իսկ քաղաքական խմբերը կենտրոնացել են միմյանց նկատմամբ ատելություն սերմանելու վրա։

«Որքան խորանում են հասարակության մեջ հակասությունները և ատելությունը, այնքան ավելի մեծ խոչընդոտներ են առաջանում երկրի զարգացման համար։ Իշխանությունն ու ընդդիմադիր դաշտը չեն նպաստում համախմբմանն ու կառուցողական լուծումներին։ Եթե տարիներ առաջ մեր հասարակությունը ներկայացվում էր որպես «հպարտ քաղաքացիներ», ապա այսօր մարդկանց փորձում են համոզել հրաժարվել ազգային ինքնությունից ու ընդունել զիջումների ճանապարհը։ Սակայն մեր ազգը ձև ունի, մնում է բոլորին ցույց տալ մեր ձևը», – հայտարարեց Կարապետյանը։

Նրա խոսքով, իրենց գործունեության երկրորդ փուլում նախատեսում են մասնագիտական մշակած ծրագրերը, նախագծերը վերածել պետական ծրագրերի՝ շարժման հիմքով ձևավորվելիք կուսակցության գործունեության համար.
«Մասնակցելու ենք 2026 թվականին կայանալիք ընտրություններին»,- հայտարարեց Նարեկ Կարապետյանը: