Պահպանողականները վերադառնում են իշխանության․ Գերմանիան ընտրում է նոր քաղաքական ուղի

Պատմական արտահերթ ընտրություններում ՔԴՄ/ՔՍՄ պահպանողական դաշինքը՝ Ֆրիդրիխ Մերցի գլխավորությամբ, հաղթանակ տարավ՝ ստանալով ձայների 28.5%-ը և պատրաստվում է ձևավորել նոր կառավարություն։ Ռեկորդային՝ 84% մասնակցությունը արտացոլեց գերմանացիների սուր մտահոգությունը ներկա քաղաքական իրավիճակի և կուտակված ճգնաժամերի վերաբերյալ։

Ինչպես հայտնում է DW-ն, մինչ գործող կանցլեր Օլաֆ Շոլցը պատրաստվում է հեռանալ պաշտոնից, նրա ՍԴԿԳ կուսակցությունը կրեց աննախադեպ պարտություն՝ ստանալով ընդամենը 16.4% ձայն, ինչը վատագույն արդյունքն է կուսակցության պատմության մեջ։ Այնուամենայնիվ, սոցիալ-դեմոկրատները կարող են մնալ իշխանության մեջ՝ որպես կրտսեր գործընկեր ՔԴՄ/ՔՍՄ-ի հետ կոալիցիայում։

Ընտրությունները նշանավորվեցին ծայրահեղ աջ «Այլընտրանք Գերմանիայի համար» (ԱԳՀ) կուսակցության էական ուժեղացմամբ, որը կրկնապատկեց իր նախորդ արդյունքը՝ ստանալով 20.8% ձայն։ Կուսակցության համանախագահ Ալիս Վայդելն արդեն հայտնել է պահպանողականների հետ համագործակցելու պատրաստակամության մասին, սակայն Մերցը կտրականապես մերժել է նման հնարավորությունը՝ ընդգծելով եվրոպական ինտեգրման և Ռուսաստանի հետ հարաբերությունների հարցում հիմնարար տարաձայնությունները։

Անակնկալ էր Ձախ կուսակցության հաջողությունը, որը ստացավ ձայների ավելի քան 8%-ը, հատկապես երիտասարդների շրջանում։ Սա մասամբ պայմանավորված էր բունդեսթագում միգրացիայի սահմանափակումների վերաբերյալ վերջին քվեարկությամբ, երբ պահպանողականները աջակցեցին ԱԳՀ-ի նախաձեռնությանը, ինչը մոբիլիզացրեց ձախ ընտրազանգվածին։

Նախընտրական քարոզարշավն ընթանում էր բազմաթիվ մարտահրավերների ֆոնին՝ տնտեսական լճացում, միգրացիոն ճգնաժամ և միջազգային լարվածություն։ Քարոզարշավի վրա հատկապես ազդեցություն ունեցան Դոնալդ Թրամփի ապագա վարչակազմի հայտարարությունները և Իլոն Մասկի կողմից ԱԳՀ-ին հրապարակային աջակցությունը, ինչը դիտարկվեց որպես ընտրություններին միջամտություն։