Ձերբակալված ադրբեջանցիներին հանձնելու հարցը կարող է քննարկվել միայն փոխադարձ հիմունքներով

Բաքվի հետ բանակցությունների արդյունքում ձևավորվեց ընդհանուր ըմբռնում, որ մոլորված և կողմն անցած քաղաքացիներն ու զինծառայողները պետք է արագացված կարգով տեղափոխվեն հակառակ կողմ։ Այս մասին այսօր՝ մայիսի 22-ին, լրագրողների հետ հանդիպման ժամանակ հայտարարեց ՀՀ վարչապետ Նիկոլ Փաշինյանը։

«Այս պահին Հայաստանում չկան ադրբեջանցիներ, ովքեր պատահաբար հայտնվել են երկրում, քանի որ մոլորվել են։ Հայաստանում ադրբեջանցիները հատել են սահմանը՝ իմանալով դա։ Դա իրենց որոշումն էր։ Բայց բոլոր այն կորած ադրբեջանցիները, որոնք կհայտնվեն Հայաստանի տարածքում, արագացված կարգով կտեղափոխվեն հակառակ կողմ»,- ասաց նա։

Հարցին, թե հնարավոր համարո՞ւմ է սահմանը կանխամտածված հատած և քրեական, այդ թվում՝ սպանության հոդվածներով մեղադրվող երկու ադրբեջանցիների արտահանձնումը, Փաշինյանն ասաց.

«Հարաբերությունների կարգավորումը երբեմն բարդ որոշումներ է պահանջում։ Բայց դա չի կարող լինել միակողմանի հիմունքներով։ Այո, մենք պատրաստ ենք դա քննարկել, իհարկե, բոլոր օրինական ընթացակարգերը անցնելուց հետո, քանի որ չենք կարող անտեսել Հայաստանի քաղաքացու սպանության փաստը։ Բայց մենք չենք խախտի անմեղության կանխավարկածը։ Գործը կտարվի դատարան, դատարանը որոշում կկայացնի, որից հետո հնարավոր են տարբեր իրավական ընթացակարգեր»,- ասաց վարչապետը։