«Դիմադրության» շարժման կողմնակիցները սկսել են արգելափակել մայրաքաղաքի մետրոպոլիտենը

«Դիմադրության» շարժման համակիրները սկսել են արգելափակել Երեւանի մետրոպոլիտենի կայարանները։

Ակտիվիստները թույլ չեն տալիս գնացքներին հեռանալ:

Ավելի վաղ «Դիմադրության» շարժման կողմնակիցները սկսել էին արգելափակել մայրաքաղաքի մի շարք փողոցներ։ Մայրաքաղաքի կենտրոնական փողոցներում խցանումներ են գոյացել:

Հայաստանի ոստիկանությունը քաղաքացիական անհնազանդության ակցիաների ժամանակ բերման է ենթարկել 277 ակտիվիստի, ովքեր փակել են փողոցները՝ պահանջելով վարչապետ Նիկոլ Փաշինյանի հրաժարականը։

VERELQ-ը հիշեցնում է, որ Հայաստանում ապրիլի 25-ից տեղի են ունենում ընդդիմության զանգվածային բողոքի ակցիաներ, որոնց մասնակցում են Հայաստանի երկրորդ նախագահ Ռոբերտ Քոչարյանի "Հայաստան" դաշինքի, Հայաստանի Հանրապետական կուսակցության (ՀՀԿ) եւ Արթուր Վանեցյանի "Պատիվ ունեմ" խորհրդարանական դաշինքի կողմնակիցները:

Դրա պատճառը ՀՀ վարչապետ Նիկոլ Փաշինյանի հայտարարությունն էր Լեռնային Ղարաբաղի կարգավիճակի վերաբերյալ հայկական կողմի "նշաձողի իջեցման" հնարավորության մասին։

Ակտիվիստները ցերեկը փակում են փողոցները, պիկետներ կազմակերպում մայրաքաղաքի տարբեր հատվածներում, իսկ երեկոյան երթեր են անցկացնում Երեւանի կենտրոնական փողոցներով։ Ընդդիմությունը վրաններ է տեղադրել Երևանի կենտրոնում։