Ուսանողների ընդվզումը. ի՞նչ հետեւանքներ այն կարող է ունենալ Պնախարարի համար
ԵՊՀ ուսանողներն այսօր դասադուլ եւ բողոքի ակցիաներ անցկացրեցին համալասարանի տարբեր մասնաշենքերի, Պոլիտեխնիկական եւ Ագրարային համալսարանների մոտ ընդդեմ տարկետման իրավունքի սահմանափակման:
Ուսանողները բողոքի ակցիայի ժամանակ բախվեցին բուհերի փակ դռներին եւ նրանց աշխատակիցների հորդորներին՝ «հեռանալ և չխանգարել իրենց դասերը»: Բողոքի ակցիայի մասնակիցները վերջում նորից վերադարձան ԵՊՀ-ի դիմաց, իրենց պահանջներով կազմեցին հատուկ նամակ, որը նախատեսում են փոխանցել Կրթության եւ գիտության եւ պաշտպանության նախարարություններին:
«Զինվորական ծառայության եւ զինծառայողի կարգավիճակի մասին» նոր օրենքի նախագծի համապատասխան հոդվածում ասվում է՝ տարկետում տրվում է, եթե քաղաքացին Պաշտպանության նախարարության հետ կնքում է քաղաքացիաիրավական բնույթի պայմանագիր։
Այսինքն, ըստ այս օրինագծի, ուսման համար տարկետում կտրվի միայն այն դեպքում, եթե քաղաքացին պայմանագիր կնքի Պաշտպանության նախարարության հետ, ընդ որում, այդ դեպքում արդեն ուսումնառությունից հետո քաղաքացին պարտավորվում է բանակում ծառայել ոչ թե 2, այլ արդեն 3 տարի:
Ուսանողները նշում են, որ այս օրենքի նախագծով ուսանողները զրկվում են գիտությամբ զբաղվելու հնարավորությունից: «Խոսքը միայն 130-140 ուսանողների մասին է տարեկան կտրվածքով: Սա անգամ բանակի թվաքանակ չի կարող էականորեն ավելացնել, սակայն մեծ հարված է հասցնում գիտությանն ու կրթությանը», - նշում են նրանք եւ վանկարկում «տարկետում, լինելու է» եւ «դա-սա-դուլ»:
«Հանուն գիտության զարգացման» նախաձեռնության անդամները հայտարարեցին, որ շարունակելու են բողոքի ակցիան՝ ընդդեմ տարկետման իրավունքի սահմանափակման: Նախաձեռնության անդամ Դավիթ Պետրոսյանը հայտարարեց, որ եկել են բարձրաձայնելու այն մարդկանց կարծիքը, որոնք դեմ են այս օրինագծին: «Ավելի լավ է ունենալ կարծիք, լինել կողմ, քան լինել չեզոք»,- ասաց նա:
Բողոքի ակցիայի մասնակիցները նաեւ նշում էին, որ օրինագծի հեղինակներ են փաստացի նրանք, ովքեր բանակում չեն ծառայել: «Բոլորը պետք է ծառայեն, սակայն մարդ, ով գիտությամբ է զբաղվում, արդեն իսկ ծառայում է պետությանը: Համալսարանի ասպիրանտուրան կորցնելու է իր մրցակցային առավելությունները»,- ասում են նրանք:
Պոլիտեխնիկական համալսարանից ուսանողները շարժվեցին դեպի ԵՊՀ՝ կենտրոնական մասնաշենք, որտեղ եւ փաստացի ավարտվեց բողոքի ցույցը: Նրանք ցանկություն հայտնեցին հանդիպել Լևոն Մկրտչյանին: Ակցիայի մասնակիցները հորդորեցին միանալ իրենց, եթե ցանկացողներ կան, իսկ նրանցից, ում խանգարել են, ներողություն խնդրեցին:
Քաղաքական մեկնաբանները կարծում են, որ բողոքի ակցիայի հնարավոր ծավալումն ու արդյուանվետ ավատը կարող է նշանակել Վիգեն Սարգսյանի քաղաքական կարիերայի ավարտ, որը նաև դիտարկվում է 2018 թվականի ապրիլի վարչապետի թեկնածուների շրջանակում:
Նշվում է, որ անցումանյին փուլում գտնվող իշխանության պարագայում, որտեղ տարբեր խմբեր սկսել են դիրքային տեւական պայքար ներիշխանական ուժերի հարաբերակցության կամ ստատուս քվոյի համար, լայն հնչեղություն ունեցող հարցեր կարող են վերածվել հարաբերությունների պարզաբանման եւ միմյանց վրա ճնշումներ բանեցնելու գործիքի:
