Ղարաբաղյան հարցում այնքան բաց հարցեր կան, որ խնդիրը լուծված համարել չի կարելի։ Այս մասին հարցազրույցում ասել է Հայաստանում ԵՄ պատվիրակության ղեկավար Անդրեա Վիկտորինը։ Նրա խոսքով, ԵՄ-ն պատրաստ է աջակցել Լեռնային Ղարաբաղի հակամարտության լուծմանը։ «Բնականաբար, ցանկացած փուլում, ցանկացած քայլ անելով, մենք կխորհրդակցենք ԵԱՀԿ Մինսկի խմբի համանախագահության հետ, քանի որ դա նաև Հայաստանի կառավարության դիրքորոշումն է»,- ասաց նա։ Դեսպանն ընդգծել է կողմերի միջեւ երկխոսությունը շարունակելու անհրաժեշտությունը՝ նշելով, որ հենց այդ նպատակով է անցած տարեվերջին Բրյուսելում կազմակերպվել Հայաստանի եւ Ադրբեջանի ղեկավարների հանդիպումը։ Մինչդեռ, հիշեցնենք, ադրբեջանական կողմը դեմ է ԵԱՀԿ Մինսկի խմբի համանախագահության շրջանակներում արցախյան հիմնախնդրի կարգավորման բանակցությունների վերսկսմանը` խնդիրը համարելով լուծված։
