Այսօր կեսօրին Սրբազան շարժումը ակցիա է իրականացնում Գլխավոր դատախազության շենքի դիմաց, ինչպես և նախապես հայտարարել էր: Շարժման առաջնորդ Բագրատ Սրբազանը հայտարարեց, թե ինչու են հենց այստեղ եկել. "Հանցագործություններին գնահատական տալու, ինչպես նաև կանխարգելիչ միջոցներ ձեռնարկելու համար",- ասաց նա: Հայտարարեց, երկու գործ ունեն հանձնելու դատախազությանը, թեև հասկանում են, որ այսօր մեր երկրում որևէ ինստիտուտ չի ծառայում պետությանը, այլ ծառայում է մի մարդու ու իշխանությանը: Այլապես, նշեց նա, մինչ այսօր գնահատականներ տրված կլինեին և համապատասխան գործողություններ կլինեին իրավապահ համակարգի կողմից: "Եվ մեր այստեղ գտնվելու առաջին պատճառը հենց դա է: Մենք այստեղ ենք, որպեսզի պահանջենք, որ քրեական վարույթ հարուցվի Նիկոլ Փաշինյանի դեմ՝ որպես Արցախի ժողովրդի հանդեպ ցեղասպանության, էթնիկ զտման հանցակցի",- հայտարարեց Բագրատ Սրբազանը: Բագրատ Սրբազանը հավելեց՝ մեր երկրում հանցագործությունների շղթան շարունակվելու է այնքան ժամանակ, քանի դեռ այն չենք կանխել ու գնահատական չենք տվել։ Նա նաև ժամանակ տվեց գլխավոր դատախազին, որ վայր իջնի և բացատրություն ներկայացնի: Իսկ եթե չիջնի ողջամիտ ժամանակ հետ, ապա "գործընթացը այստեղ կշարունակվի":
