Իսրայելը Հայաստանին առաջարկել է սպառազինություն գնել, բայց Երևանը մերժել է. ՀՀ պաշտպանության նախկին նախարարը հայտարարել է, որ այն թանկ է և ոչ ձեռնտու։ Այս մասին լրագրողների հետ հանդիպմանը հայտարարել է Քնեսեթի նախկին պատգամավոր Ալեքսանդր Ցինկերը։ Նա հավաստիացրել է, որ այս հարցում գնդակը Հայաստանի դաշտում է, քանի որ «Իսրայելը միշտ բաց է և ցանկացած հարցը միշտ կարող է քննարկվել»: Ռազմաարդյունաբերությունից տարեկան շուրջ 5-6 մլրդ դոլար վաստակող Իսրայելի ներկայացուցիչն անդրադարձել է այն հանգամանքին, թե իրենց սպառազինում են Ադրբեջանին՝ հակադարձելով՝ ՀՀ ռազմավարական գործընկեր Ռուսաստանն Ադրբեջանին ավելի շատ սպառազինություն է մատակարարում, քան իր երկիրը: Դժգոհելով, որ երկու երկրների միջև պաշտոնական մակարդակում աշխուժության պակաս կա, Ցինկերը տեղեկացրել է, որ սեպտեմբերի 10-13-ը իրենք ծրագրում են հայ-իսրայելական բարեկամության միջխորհրդարանական խմբի ղեկավար Թալի Պլոսկովի և Քնեսեթի մի քանի պատգամավորների, ինչպես նաև մի շարք իսրայելցի գործարարների այցը Հայաստան. «Մենք ցանկանում ենք շահագրգիռ անձանց գտնել` կոնկրետ նախագծերի քննարկման համար»,- հավելել է նա:
