«Ծառուկյան» խմբակցությունը դեռ չի քննարկել, թե ինչպես է քվեարկելու ՀՀԿ վարչապետի թեկնածուի օգտին՝ կողմ, թե դեմ: Այս մասին VERELQ-ի հետ զրույցում նշեց ԱԺ «Ծառուկյան» խմբակցության պատգամավոր, Գագիկ Ծառուկյանի խոսնակ Իվետա Տոնոյանը: «Առաջիկայում Գագիկ Ծառուկյանի գլխավորությամբ կլինի խմբակցության նիստ և որոշում կկայացվի»,- նշեց Տոնոյանը: Նախօրեին համանուն խմբակցության պատգամավոր Սերգեյ Բագրատյանը հայտարարել էր, որ եթե իրենք կողմ քվեարկեն Սերժ Սարգսյանի թեկնածությանը, ապա ընդդիմություն չեն: Իվետա Տոնոյանը, սակայն, հրաժարվեց մեկնաբանել կուսակցի հայտարարությունը՝ միայն նշելով, որ դա պարոն Բագրատյանի անձնական կարծիքն է. «Առաջիկա օրերին որոշումը կկայացվի»,- հավելեց նա: Հիշեցնենք, ապրիլի 9-ին ՀՀ վարչապետի պաշտոնակատար, ՀՀԿ փոխնախագահ Կարեն Կարապետյանը հայտարարեց, որ Հանրապետական կուսակցությունը որոշում է կայացրել որպես առաջին դեմք ներկայացնել Սերժ Սարգսյանի թեկնածությունը: Նշենք, որ ապրիլի 17-ին Ազգային Ժողովի հատուկ նիստում պատգամավորները կքննարկեն ՀՀ վարչապետի ընտրության հարցը:
