Երևանի կենտրոնական մի շարք փողոցներ շարունակում են փակ մնալ: Մասնավորապես, փակ են Արշակունյաց փողոցը` միակողմանի, Երևանի քաղաքապետարանի հարակից տարածքը, Ամիրյան-Մաշտոց փողոցների խաչմերուկը, Հաղթանակ կամուրջը մասամբ` երթևեկությունը դժվարանցելի է:Քիչ առաջ ոստիկանները հորդորում էին ցուցարարներին լքել Հաղթանակի կամուրջը, հեռացնել այդտեղ կայանած մեքենաները` կամուրջի փլուզման վտանգի պատճառով: Ցուցարարները երկար դիմադրեցին, սակայն հետո որոշում կայացրեցին տեղափոխվել դեպի Երևանի քաղաքապետարան ու հետո շարժվել դեպի Նիկոլ Փաշինյանի գլխավորած ցուցարարները:Տեղեկացրեցինք նաև, որ Երևանի քաղաքապետարանի հարակից հատվածում քիչ առաջ բախում տեղի ունեցավ ցուցարարների ու հատուկ ջոկատայինների միջև` նրանք մահակներով հարձակվեցին երիտասարդների վրա: Ըստ որոշ տեղեկությունների` կան բերման ենթարկվածներ: VERELQ-ի թղթակիցը տեղեկացնում է, որ բախում է տեղի ունեցել նաև Ամիրյան-Մաշտոց փողոցների խաչմերուկում, այս հատվածը ևս շարունակում է փակ մնալ: Կան բերման ենթարկվածներ նաև այդ հատվածից:
