Ադրբեջանի իրավապահ մարմիններն անցած կիրակի գործողություն են իրականացրել հանրապետության պաշտպանության նախարարությունում, ձերբակալվել մի քանի բարձրաստիճան պաշտոնյաների, այսօր՝ փետրվարի 14-ին, հայտնում է EADaily-ն՝ վկայակոչելով տեղական լրատվամիջոցները։ Ադրբեջանի ՊՆ ֆինանսական վարչության պետ գնդապետ Ռաֆայել Խալիլովը, ռազմական գերատեսչության ցամաքային զորքերի ֆինանսական բաժնի պետ Բայրամ Բայրամովը, երկրի զորամասերից մեկի ֆինանսական բաժնի պետ Ֆարահիմ Սյարկյարովը և նախարարության սպա Վուսալ Ալիզադեն բերման են ենթարկվել։ Նրանց մեղադրանք է առաջադրվել ՀՀ քրեական օրենսգրքի 179.4 հոդվածով (առանձնապես խոշոր չափերով յուրացում): Բաքվի զինվորական դատարանի որոշմամբ նրանցից յուրաքանչյուրը կալանքի տակ է առնվել 4 ամսով։ Բայրամովը մեղադրվում է 2 միլիոն 635 հազար մանաթի (մոտ 1,6 միլիոն դոլար) յուրացման մեջ, Սյարկյարովը՝ 450 հազար մանաթի (260 հազար դոլար) յուրացման մեջ։ Ալիզադեյին մեղադրանք է առաջադրվել 1,8 միլիոն (ավելի քան 1 միլիոն դոլար) յուրացման մեջ։ Պետությանը ամենամեծ ֆինանսական վնասը, ըստ հետաքննության, պատճառել է գնդապետ Խալիլովը՝ 10 մլն մանաթ (5,9 մլն դոլար)։