ԱԺ նախագահ Արա Բաբլոյանը բացասական է գնահատել «Ելք» խմբակցության ղեկավար Լենա Նազարյանի հայտարարությունն այն մասին, որ հնարավոր է կրկին մարդկանց փողոց դուրս բերել արտահերթ խորհրդարանական ընտրություններ անցկացնելու համար։
«Ես բացասական եմ գնահատում այդ հայտարարությունը։ Մենք արդեն անցել ենք այդ փուլով եւ պետք է գնանք ժողովրդավարական ճանապարհով, այսինքն՝ քաղաքական ուժերի կոնսենսուսի ճանապարհով»,–նշեց Բաբլոյանը, հայտնում է news.am։ «Հայաստանն իր դեմքը ցույց է տվել աշխարհին, նա զարմացրել է աշխարհին իր հանդուրժողականությամբ եւ ժողովրդավարական փոփոխություններին հանձնառությամբ, եւ մենք չպետք է հրաժարվենք դրանից»,–շեշտեց նա։
Վարչապետ Նիկոլ Փաշինյանի և խորհրդարանական ուժերի բանակցությունները ակնկալվում է հրատապ ռեժիմով անցկացնել: Սա թույլ կտա, որ հնարավորինս շուտ որոշվեն Ազգային ժողովի արտահերթ ընտրությունների անցկացման մեխանիզմները և ժամկետները: Այս մասին «Հայկական ժամանակ»-ին ասել էր ԵԼՔ խմբակցության ղեկավար Լենա Նազարյանը: Նա էր չբացառել, որ ԱԺ արտահերթ ընտրությունները կանցկացվեն մինչև տարեվերջ: Խմբակցության ղեկավարը նշեց, որ օրակարգում առկա է արտահերթ ընտրությունների անցկացման երկու տարբերակ:շ
Լենա Նազարյանը չէր բացառել, որ հարկ եղած դեպքում իշխանությունները կօգտագործեն նաև փողոցային պայքարի տարբերակը: Այնուհանդերձ, օրվա իշխանությունները նախընտրում են բանակցային ճանապարհը: «Փողոցային պայքարը վերջին էտապն է։ Դա ամենաանցանկալի ճանապարհն է, որը չեմ բացառում, բայց տեսել ենք, որ Նիկոլ Փաշինյանը միշտ պատրաստ է եղել բանակցելու: Եթե այլևս հնարավոր չլինի բանակցել, ապա չեմ բացառում, որ մարդիկ դուրս գան փողոց: Դա ցանկալի չէ, քանի որ այդ տարբերակը խաթարում է բնականոն ընթացքը»,- ասաց պատգամավորը:
Անդրադառնալով խորհրդարանական ընտրությունների անցկացմանը՝ Բաբլոյանը հայտարարեց, որ այդ հարցում ինքը հավատարիմ է ծրագրային գործունեությանը. «Ներկայումս աշխատանքային խումբը աշխատում է ԸՕ փոփոխությունների շուրջ։ Դրանք պետք է քննարկվեն հանրության եւ մյուս քաղաքական կուսակցությունների հետ։ Միայն դրանից հետո մենք կարող ենք ընտրությունների անցկացման ժամկետներ որոշել»,–նշել է Աժ նախագահը։
ՀՀ վարչապետ Նիկոլ Փաշինյանի հայտարարության մասին, որ պետք է սահմանադրական փոփոխություն անցկացնել, Բաբլոյանը շեշտեց, որ հստակ առաջարկներ դեռեւս չկան։ «Եթե հստակ առաջարկներ լինեն անհրաժեշտ փոփոխությունների շուրջ, ապա այն եւս կքննարկենք»,–եզրափակեց նա։
Նյու Յորքում՝ ԱՄՆ համայնքային կառույցների, հայկական կազմակերպությունների ներկայացուցիչների հետ հանդիպման ժամանակ վարչապետ Նիկոլ Փաշինյանը հայտնել է, որ առաջիկայում բանակցություններ կհրավիրի խորհրդարանական արտահերթ ընտրությունների հարցով: «Կար տրամադրություն, որ դրանք անցկացվեն մինչ հաջորդ տարվա հունիս, բայց ընտրությունները պետք է անցկացնենք ավելի վաղ, որպեսզի առավել շուտ սկսենք տնտեսության վերականգնման ընթացքը», - ասել է Հայաստանի վարչապետը: «Երևանի ավագանու ընտրությունների արդյունքներով բոլորին ակնհայտ է, որ խորհրդարանական արտահերթ ընտրություններն անխուսափելի են, և դրանք պետք է հնարավորինս շուտ տեղի ունենան», - ընդգծել է Փաշինյանը:
Ավելի վաղ այսօր Փաշինյանը հայտարարեց, որ վերադառնալուն պես սկսելու է խորհրդակցություններ խորհրդարանական ու արտախորհրդարանական ուժերի հետ:
