«Նախիջևանում տեղակայված ժամանակակից սպառազինությունը՝ այդ թվում հեռահար հրթիռները, ի զորու են ոչնչացնելու թշնամու ցանկացած ռազմական թիրախ»,- Նախիջևանի Ինքնավար Հանրապետություն կատարած այցի ժամանակ հայտարարել է Ադրբեջանի նախագահ Իլհամ Ալիևը:
Ադրբեջանի նախագահը կրկին անգամ սպառնում է ՀՀ–ին ու ԼՂՀ–ին`արդեն իսկ հայաստանյան ներքաղաքական իրադարձությունների հանգուցալուծումից հետո, երբ ձևավորվել է նոր կառավարություն։
Դա նշանակում է մեկ բան` Բաքուն չի փոխում իր մաքսիմալիստական դիրքորոշումը Ղարաբաղի հարցում ու խախտում է Մինսկի խմբի կողմից բազմաթիվ անգամ շեշտված կարգավորման կարևորագույն սկզբունքներից մեկը` ուժի կիրառման սպառնալիքը։
Ադրբեջանը շարունակում է սպառնալ ուժ կիրառել, եթե ղարաբաղյան հարցը չկարգավորվի նրանց տեսլականով`յոթ շրջանների վերադարձ, իսկ նախկին ԼՂԻՄ–ի տարածքի մեջ մտնող շրջանները`այնտեղ ադրբեջանցիների վերադարձից հետո, պետք է ինքնորոշվեն`այն էլ Ադրբեջանի տարածքային ամբողջականության շրջանակներում։
Բաքուն տարիներ շարունակում նախագահի, ԱԳ նախարարի մակարդակներով հայտարարում է, որ Ադրբեջանի տարածքային ամբողջականությունը քննարկման առարկա չէ, իսկ Իլհամ Ալիևը «հավակնություններ» ունի անգամ Սյունիքի, Սևանա լճի, Երևանի նկատմամբ։
Այս պարագայում Նախիջևանը դառնում է այն ռազմական պլացդարմը, որտեղից Ալիևը կարող է կյանքի կոչել իր սպառնալիքները`թե Զանգեզուրի, թե Երևանի նկատմամբ`սպառնալով հարվածել այդ թվում ԼՂՀ–ի խոր թիկունքին։
Ադրբեջանը հաջորդ պատերազմում փորձելու է կիրառել «երեք ճակատների» մարտավարությունը` մեկը առաջնայինը լինելու է ղարաբաղյան ճակատը Ադրբեջանը փորձելու է ապրիլին գրաված դիրքերից`Թալիշի մերձակայք և Լելե Թեփե կրակի տակ պահել լայն շառավիղով ռազմավարական նշանակության օբյեկտները, գյուղերն ու քաղաքները, ինչպես նաև այդ դիրքերն օգտագործել, որպես նոր տարածքներ գրավելու մեկնակետեր կամ հենակետեր։
Երկրորդ ճակատը` Նախիջևանն է լինելու, որտեղից Բաքուն կրակի տակ է պահելու ՀՀ–ի ռազմավարական նշանակության մարզերը`Արարատի մարզը`գյուղատնտեսական ահռելի ներուժ, Վայոց Ձորը` բնական պաշարներ` «կապող օղակ» կյանքի ճանապարհ Սյունիք–Իրանի հետ, ինչպես նաև Սյունիքի մարզը, որն ունի հանքաարդյունաբերական հզոր ներուժ, այդ մարզում գտնվող հզորություններն ապահովում են ՀՀ–ի բյուջեի զգալի մասը, իսկ Սյունիքով են անցնում Իրանի հետ կապող ռազմավարական, այլընտրանքային (Վրաստանը, որպես արտաքին աշխարհին կապող «պատուհան») ճանապարհները։
Երրորդ ճակատը լինելու է Տավուշի մարզը` 3-րդ բանակային կորպուս։ Բաքուն, կրակի տակ պահելով այդ մարզի սահմանամերձ գյուղերն ու առաջնագծում գտնվող զորամասերը, թույլ չի տալու, որ այդտեղից զորքերը տեղափոխվեն և Վարդենիս-Մարտակերտ կարճ ճանապարհով օպերատիվ կերպով օգնության հասնեն հիմնական ճակատ` Արցախին։ Բացի այդ՝ կրակի տակ է պահվելու միջպետական` ՀՀ-Վրաստան ճանապարհը, որն անցնում է հենց Տավուշի մարզով` խոչընդոտելով ՀՀ-ի տնտեսական կյանքն ու քաղաքացիների տեղաշարժը։
